На новогодишната лотарија во Лозово оваа година шпоретот го доби ќерката на градоначалникот на општина Лозово Ацо Велковски.
На видеото пренесувано во живо преку социјалните мрежи се гледа како водителката на лотаријата го извлекува билетот (кој чини 50 денари) чиј што сериски број таа веднаш го толкува дека е на ќерката на градоначалникот. Во тој момент ќерката на градоначалникот која “случајно” се нашла во просторијата каде се одржува лотаријата која била затворeна за пошироката јавност согласно ковит препораките, веднаш доаѓа на лице место и соопштува дека со семејството (кое што не било присутно на самата лотарија) одлучиле шпоретот да го донираат.
Ова е втора вредна награда која што ја добива поширокото семејство на градоначалникот Ацо Велковски по минатогодишната награда во новогодишната лотарија за неговиот роден брат со кој што живеат во еден семеен објект.
Дополнително во јавноста се појавија билети за самата лотарија на кои што стои службениот печат на Општина Лозово а на други лотариски билети воопшто и нема печати.
Оттука се поставува прашањето дали користењето на службениот печат на општината за оваа новогодишна лотарија е користен во рамки на законските прописи со оглед на тоа што општината како давател на јавни услуги не е овластена да организира наградни игри на среќа?
