Благодариме на сите искрени честитки кои дојдоа од цела Македонија, од надвор од регионот, од пошироко и од сите страни.
Велат дека на мака се познаваат јунаците и пријателите, но ние велиме дека во радоста уште повеќе се познаваат оние кои се наши искрени пријатели.
Оние кои се радуваат со нашата радост, оние кои го почитуваат успехот, оние кои го препознаваат хероизмот и надчовечкиот напор со кои до успехот е дојдено, но и оној мал дел кои на успехот и радоста им завидуваат и ги гледаат ко негативна појава само поради тоа што не ги доживеале тие, туку некои други…
Им благодариме на сите кои се одзваа на повикот за заедничко дефиле, пречек и прослава. Оние кои одвоија речиси цел ден и не мрднаа и покрај најавите за големо доцнење на авионот, до оние на Аеродромот но и до оние на Плоштадот.
Благодарност до Скопска Пивара, кои не освежија со Скопско Пиво во жешките моменти но и за цело време на Аеродромот кога имавме потреба да ја изгасиме жедта…
Им благодариме на сите кои со себеси понесоа обележја на нашиот Вардар, Национални Македонски знамиња, Македонски државни знамиња, пароли, пиротехника но пред се искрени срца и насмеани лица…
Им благодариме на Ноќни Волци кои направија дневниот конвој од Јане Сандански до Аеродромот да изгледа спектакуларно…
Моќните звуците од нивните мотори да го разбудат и мобилизираат и оној мал дел од градот кој до тогаш сеуште не беше станат на нозе…Дефилето од Аеродромот Александар Велики до Плоштадот Македонија да изгледа како една сеопшта инвазија од апокалиптични размери, како организирана и дисциплинирана евакуација на цел еден град “на безбедно” за време на ерупција на активен вулкан.
А таму пак во центарот на тој град повторно се активира уште еден уште помасивен – Супер вулкан, од кој нема бегање и сите кои се најдени таму се опуштени и препуштени, па и затоа се радуваат ко да се последните моменти…па ако треба да биде нека биде, и нека не однесе сите судбината со насмевка, во голем стил, во прегратка на најблиските, пеејќи на цел глас песни кои ги исполнуваат срцата.
Им благодариме на сите кои на било кој начин учествуваа во организација на онаа незаборавна ноќ, која помина и во раните утрински часови, за да може токму на Плоштадот со Европската титула и заедно со цела Црвено-Црна Армија да го прославиме нашиот Триесет и втори роденден.
Им благодариме на RK Vardar комплетно од економот, стручниот штаб, раководството, сопственикот но пред се на момците кои изгинаа на терен и пружија надчовечки напори за повторно да не израдуваат нас навивачите, но и цел Македонски народ, подарувајќи ни надеж, нова енергија и поголема верба во самите себеси. Не дигнаа од мртвите кога се делуваше безнадежно и кога народот делуваше понижен и покорен. Не потсетија дека никогаш не треба да се откажеме и секогаш треба да се бориме за она што го сакаме.
Благодариме што му донесоа втора ѕвезда на клубското лого која вечно ќе стои таму да го краси се до моментите додека не се направи место за уште некоја. Сега тоа е наша следна цел, затоа што видовме заедно колку овој народ е гладен за вакви успеси, и веројатно никаде на светот не е повеќе посакувана титулата и не се слави повеќе отколку тука…
Ви благодариме на сите вас големи играчи кои си заминувате од овој голем клуб, си заминувате со кренати глави и како национални јунаци. Си заминувате но бидете сигурни дека вашите дела и пожртвуваност за дресот со боите Црвена и Црна никогаш нема да бидат заборавени и секогаш сте добредојдени во овој наш град и оваа наша најсакана земја Македонија!
Ви благодариме на сите вас кои останувате лојални на Вардар во годините кои доаѓаат, вие ќе бидете костурот на следниот тим од кој ќе стравува цела Европа, коски ќе им се тресат а истовремено ќе сакаат да бидат покрај вас за да преземат барем мал дел од енергијата која ја создаваме и ќе ја создаваме заедно.
Заедно сме најсилна љубов !
Заедно сме моќна институција !
Заедно сме Македонска Авангарда !
#ВардарВоСрцето#МакедонијаВоДушата
