70 годишниот Ибрахим Едипов од с.Црник со голема желба и мерак речиси целиот свој живот изработува трмки познати и како улишта. Техниката ја научил од своите прадедовци, а за да изработи квалитетно улиште употребува исклучиво гранки од ракита, вид врба која како што вели Едипов е најпогодна за изработка на овој вид на сад кој исклучиво служи за заштита на пчелите и кој служи исклучиво за складирање на најквалитетниот производ од пчелата. Улиштата како што вели Едипов се далеку покорисни од сандаците бидејки во нив вредниот инсект може да преживее в зима без притоа да биде нападнат од други инсекти и животни. Тоа е така бидејки на крајот од улиштето се прави сосем мал отвор кој е доволен пчелата да влегува и излегува и да го остави собраното во текот на цветните денови. Откако ќе обезбеди гранки од ракита за да исплете едно улиште на чичко Ибрахим му се потребни околу два часа. Освен основата, најважен дел за изработка на улиштето како што објаснува чичко Ибрахим е и премачкувањето на улиштето со глазура која најчесто се прави од измет од домашни животни. Како најпогоден се користи оној од магаре, бидејки според кажувањето на чичко Ибрахим тој по зимувањето на пчелата може да ја извади и „најмрзливата“ пчела и да ја натера веднаш да се впушти во работа. Низ смеа чичко Ибрахим вели дека таква пчела нема затоа што пчелите се најработливите инсекти без кои човештвото не може да се замисли. Откако во целост ќе биде изработено улиштето тоа се става на определено место кое пчеларот ќе го оцени како најпогодно и така се остава во него да „работи“ пчелата. Чичко Ибрахим не одгледува пчели веќе 7 години, бидејки имал проблем со здравјето, а се грижи и за неговата сопруга која е неподвижна. Кога ќе се создадат услови Едипов повторно би се нафатил да се занимава со неговата пасија пчеларството. Чичко Ибрахим го оставивме во неговиот дом да внимава на сопругата, но и да ужива во рзговорот со своите внуци кои како што вели му се најголемото богатство во животот.
