Професорот Владимир Трајковски, професор по генетика на социјалните мрежи објави дека откажал учество на конференцијата “Актуелности во логопедијата, окупационата терапија и социјалната работа” (АЛОС 2019) која ќе се одржи во Белград во соседна Србија на 28 и 29 ноември оваа година. Причината поради која професорот Трајковски од универзитетот “Св. Кирил и Методија” во Скопје како што тој самиот објаснува е „пежоративноста на придавката пред името Македонија“. Притоа професорот Трајковски кој што е автор на 95 научни трудови и 7 книги, соопшти дека повеќе нема да учествува на ниту една конференција на која се користи терминот на “с” пред вистинското име на земјата – Македонија.
Тој на фејсбук објави свое соопштение во врска со овој негов потег:
“Штотуку откажав учество на конференција кај северниот сосед на „Северна”, заради пежоративноста на називот на нашата држава Македонија до моето име. Покрај моите напори да биде вратено вистинското име на нашата држава во кое за краток период и успеав, но поради официјалната политика на северниот сосед, повторно беше вратен пежоративниот назив пред името Македонија. Ако можам јужните соседи и некако да ги разберам во нивните етноцидни намери, поранешните ЈУ народи не можам да ги сфатам.
Изјавувам дека нема да учествувам на ниту една конференција кај поранешните ЈУ држави кои ќе го користат сложениот назив на мојата татковина, покрај моето име.
Македонија вечна!”
-напиша професорот Владимир Трајковски на фејсбук.
Дополнително професорот Трајковски на својот блог во подолга верзија ја образложи генезата за својата постапка на откажување на учеството на научната конференција АЛОС 2019.
Неговата објава од неговиот блог поради значењето и големината на неговиот потег ја пренесуваме во продолжение во целост:
Драги читатели,
Вчерашната објава на ФБ за повлекување од конференцијата АЛОС 2019 во БГ предизвика многу реакции затоа должен сум ви дополнителни објаснувања. Имено пред неколку месеци бев замолен од една колешка со која се знаеме 18 години да бидам дел од програмскиот одбор на нивната конференција и да бидам пленарен предавач. Прифатив без многу размислување иако агендата оваа година ми е пренабиена. Ајде во име на старото познанство, си реков, нека оди на моја глава. Во почетокот на нивната веб страница стоеше покрај моето име, името Македонија, за да по извесно време во октомври месец забележам дека стои пежоративниот назив „Северна”. Не знам колку долго стоело така, бидејќи не им го следев сајтот секој ден. Кога забележав, веднаш реагирав да се тргне тоа име и на мое изненадување по извесен малку подолг период навистина беше тргнато. Вчера сосема случајно влегов на официјалната веб страница и видов дека повторно е вратен навредливиот назив. Навистина не ми е јасно како некој со кој си бил во иста заедница до 1991 година, како некој кој ти се прави братски народ може да ја злоупотребува твојата мака и во исто време добрина. Веднаш реагирав вчера бидејќи веќе ми беше несериознио менувањето во повеќе наврати и објаснив дека доколку остане така подготвен сум да се повлечам, бидејќи националното достоинство и честа ми се пред некои други работи. За моја голема жал, ми беше одговорено дека официјалната политика на северниот сосед го препознава новото име и дека нашата Влада веќе го користи и дека колешката не можела ништо да стори. Во прв наврат го откажав моето учество од конференцијата, за да утрово решам да се повлечам и од програмскиот одбор и да го повлечам мојот труд од зборникот на трудови. Друг избор едноставно немав. Во прдолжение ви ја проследувам е-поштата која и ја упатив утрово на заменик директорката и до директорот (во cc) на високата школа од БГ. За жал до овој момент моето име се` уште стои до пежоративниот назив на нашата држава Македонија.
Почитувана колешке,
Со должна почит кон вас како личност, како што ве известив вчера во нашата онлајн комуникација јас нема да учествувам на вашата конференција заради непочитување на моето право за самоопределување и непочитување на моето национално достоинство со користењето на називот „Северна” пред името на мојата држава Македонија. Вие како приватна установа не сте обврзани да го користите тој назив кој нашата квислиншка Влада го донесе без да има цензус на народниот референдум одржан на 30.09.2018 година во Скопје. Македонскиот народ нема никогаш да го прифати тоа пежоративно име. Името на мојата држава е Македонија. Со резигнација и индигнација ги отфрлам вашите обвинувања за непрофесионалност, бидејќи многу добро знаете каков професионалец сум и тоа најмалку во два наврати: кога ви помогнав околу вашиот докторат и кога организирав конференција во Охрид 2003 година на која вие лично присуствувавте. Доколку вашата висока школа не го почитува моето национално достоинство и чувство за самодетерминација, зошто пак јас би ја почитувал истата и би ви дошол на конференцијата за да ви направам чест?
Инаку за илустрација, неодамна се вратив од конференција во Будва во организација на Педагошкиот завод во Црна Гора и Сојузот на дефектолози на Црна Гора. Таму бев член на програмскиот одбор и без никаков проблем бев претставен како член од Македонија. Не гледам во што и зашто вие сте нешто „подобри” од колегите во Црна Гора. Затоа, најучтиво ве замолувам да го избришете моето име во програмскиот одбор на следниот линк (и во СР и во АНГ верзија двојазично), воопшто да не ме ставате во програмата и во зборникот кој се надевам дека не се отпечатени. Секој има право на избор каде ќе учествува и со кого ќе се дружи, па така и јас. Прво почит на човекови права, на национално достоинство, па после наука и све останато…
Искрено се надевам дека ќе ги испочитувате овие мои барања. Ви посакувам успешна организација на конференцијата.
Колегијален поздрав од Скопје, Македонија,”
