На централниот митинг на ВМРО-ДПМНЕ синоќа во Трговскиот центар во Кочани пред граѓаните се обрати кандидатот за градоначалник, Ратко Димитровски.
„Вечерва се гледаме очи в очи со вас, со сите вас што ни ја дадовте довербата пред четири години. Вие сте тие што преку своето демократско право нè овластивте да се грижиме за развојот на Кочани. За тоа овластување деновиве ви го испорачавме отчетот за сработеното во изминатиот период“, изјави Димитровски.
Тој, најпрвин, ги наброи условите за вработување на граѓаните во странските инвестиции, новите погони на „Антура“, „Амфенол“, „Руен инокс автомобиле“, „Хипотерм“, „Леви Диагро “. Тие и другите помали погони вработија, како што кажа Димитровски, 2.500 граѓани на Кочани.
„Бројот на невработените што го затекнавме од 12.000 падна под 4.000 наши сограѓани да бидат невработени, од кои половината се активни баратели на работа. Би ги споменал и проектите од комуналната инфраструктура. Кочани е еден од ретките градови што го реши во поголемиот дел од градот проблемот со атмосферските води. Уличното осветление во Кочани е пример како може да се зголеми осветленоста на градот за над 50 проценти и околу 300 темни точки во градот да се осветлат, а потрошувачката на струја во градот да се намали цели 75 проценти“, нагласи Димитровски.
Тој уште рече дека „Пониква“ е збогатена со постројки за вештачки снег, патеки за скијање, како и многу други работи.
„По 20 години, Кочани го доби новиот Генерален урбанистички план, а во тек е изработка на урбанистички планови за сите раминчарски села. Изградени се две спортски и седум повеќенаменски игралишта. Секоја година нашата општина им доделува 30 стипендии на нашите сограѓани што студираат на нашите универзитети. Реконструирани се училиштето во Горни Подлог и средното училиште „Љупчо Сантов“ во Оризари. Заменети се прозорците и изградена е нова градинка во Оризари“.
Димитровски се осврна и на она што е планирано во наредниот период. Тој напомена дека во програмата за наредните четири години ги има најглавните и најголеми проекти, кои ќе придонесат за развој на општината и нови вработувања, со што, како што кажа, ќе има раздвижување на целокупната економија.
На синоќешниот митинг на ВМРО-ДПМНЕ и коалицијата зборуваше и лидерот на партијата, Никола Груевски, како и носителот на листата со кандидати за своеници, Лазо Митев.
