Претседателот на ВМРО-ДПМНЕ, Христијан Мицкоски во текот на денешниот ден беше во посета на манастирот Св. Богородица во Свети Николе. Тој беше пречекан од Неговото Високо Преосвештенство Митрополитот Брегалнички Иларион на пригодна закуска, при што Мицкоски размени мислења во врска со црковниот живот во Брегалничката епархија. Со присутните граѓани Претседателот на опозиционата партија разговараше за актуелните секојдневни проблеми со кои живеат жителите на Свети Николе.
Во продолжение го пренесуваме соопштението на Христијан Мицкоски по повод овој настан:
Бев во посета на манастирот Света Богородица, Свети Николе. Народот е разочаран, потиштен, бара излез од бездната и неправдите донесени од власта. Велат селата и градовите се празнат само за луѓето од власта дојде живот, за другите е пекол. Станавме место каде криминалците се прават за успешни бизнисмени, а вистински успешните бизнисмени секој ден живеат во страв и само чекаат која цифра за некој нов рекет ќе ја испорача власта. Гледаме дека Рекет не застанува, има и Рекет 2 каде кастата на власт сакала да превзема фирми, уценува, немилосрдно пљачка. На тоа мора да му се стави крај и да се побара одговорност. А одговорноста ќе дојде кога ќе има вистинска правда. Мојата и нашата борба е за обнова на Македонија. Онаква каква ја сакаме и секогаш нашиот народ ја заслужувал. Горда и исправена, силна и напредна.
