Е дотука било?!
Ставањето на крстот на челото на Умот во рамки на државни окови ќе ни донесе еден контрапункт, еден нов Ѕвер кој ќе ви лута низ лавиринтите на Системот.
Тоа ново суштество не е Вашата совест, тоа е запечатена судбина, тоа е моментум, тоа е оган во рацете. Македонскиот народ отсекогаш бил сличен на окованиот Прометеј, вечно казнуван за Мисла, за Талент, за Срце…
Мислевте, ќе згаснете ѕвезди и ќе обоите синило, е не, не било така а? Оган, мисли, имагинација, Кауза, цел, ама сончоглетката можеби е сунѓер од впивачки соништа и мисли, ама однадвор е лажна, временски штура, таа е ароганција, себевљубени идиоми поминале покрај идиоти, азнобарачи и непријатели на сопствената совест.
Изградивте тврдина со лажни темели, не сметавте дека фундаменталното, т.е. Ние, сме непокорлив народ, Магаре бре!Како главен инает меѓу троскотите и главен троскот меѓу инаетите, им покажавме како без пари за леб се купува булдожер. Амбивалентната природа на духот и на чудовиштето во Нас, во Вас ќе ги демне сите нови генерации на слабокрвни крводарители! Го исранивте Кербер на стероиди и ботокс, чунки три глави без мозок се попаметни од една на психопатка а девица…де, де , не до толку!?
Исчукана од тристе камења, мислеше се што лета со вино се прелива и со белја на главата!? А каменот, нели иде одблизу? Бевте чеда на големдисување и на лажни величини на великодостојници, недостојни за почит од специјалното затворено одделение.Црвено-црните дамки по сивите вијуги се нашата гордост, нашиот вековен сон и стремеж.
,,Сината крв” не остави бескрвни со намалени еритроцити и со лоша крвна слика. Да се озакони спротивното на колективното Јас е затвор за сечија индивидуална ќелија.Сам ќе си пресудам и ќе бидам затворен во мојата иднина која само Бог и јас ја поплочуваме со надеж, љубов, емпатија и самобит.Ги следам смешните потези на богомолката која психопатично и пустински песокливо, ја бутка Камилата во Човекот надвор од неговиот шатор.
А надвор топло, пече црното сонце загорено на тристе степени жива вистина, да, да, жива испечена човечка несовест. Во текот на таа драматургија на ,,Камилизација” на Магарето кое инаетливо бара егзит од Шарената судбина на црвено-црните ,,Кмери”.
Интелектуално осакатени од нуклеарката која радијално ја озрачи радиоактивната душа на богомолката остануваме тука на ова парче поделена европска територија.Социо-патолошките белези на двогрбото чудовиште не го фаќа ни Метла ни Камила ќерка, и упорно си уринира врз главата на совесното Магаре (читај;Народ). Учени многу, малку фајде за Магарето! Камилата си поигра џек-пот со Магарето во шаторот на социо-психопатската природа на темните , на црните…
Очекувајте нов бран на ,,Брн аут синдром” како настинка во јули.Ве очекува наезда од скакулци и црни гулаби, ве очекува Луда пофалба на глупоста! Луда е!-рече Главниот готвач, и си ја пофали главната келнерка.И умре болеста во нејзината глава.Сега и е само-Празна!? На современата академија на ботокс, фејс лифтинг и лоботомија, на маски и лажни ветувања, на беспарица и на големи задолжувања, Таа е бјути камера на лажен фотошоп од Бенгази девојка и лемур, увезен репер од Западната кујна, Таа ви е Вашиот егзамплар за Позитивната, ,,негативна селекција”!?
Ќоро е ама наше е! Автобусот на соништата ја допре со крајчето на отворената врата, тивката девица и ја качи на белото предно седиште небаре бел коњ а црна кобила по состав и дефиниција…ја качи на жолто такси, преморена од своите интриги, болно оздравена од вирусот на лагата и дупките на мозокот, качена на предно седиште на жолто комби,таа хахаха, копилот на авакс!?
Немо ве гледа со депресивен поглед, ги гледа сенките на решетките на кафезот на шарениот папагал кој повторува во идеал: -Македонија, Македонија!
Посветено на Народот кој е исфрлен од шаторот на своето секојдневие од Камилата, од онаа истата која од Човек гради медициски извештај а од граѓани создава бегалци по туѓи шатори!?
– колумнист, Македонец и Човек