Во текот на денешниот ден здружението Меѓународен центар на Македонската дијаспора “Нова зора” Делчево од Делчево реализираше хуманитарна акција за повеќе граѓани на руралните места- селата Град, Вирче и Ветрен со донација на хуманитарни пакети со прехрамбени производи и сретства за лична хигиена.
Акцијата се реализира со донации на Македонските иселеници од повеќе европски земји а во соработка со Општинската организација на Црвениот крст од Делчево.

“Во текот на денешниот ден (понеделник, 10.08.2020 година) здружението МЦМД “Нова зора” Делчево во рамки на акцијата “Помош за Делчево” дониравме хуманитарни пакети со прехрамбени артикли и сретства за хигиена за повеќе семејства во селата Град, Вирче и Ветрен.
Помошта е наменета за семејства во социјален ризик, семејства со никакви или многу мали примања, самохрани родители и стари и изнемоштени лица.
Акцијата се спроведува со донации на Македонски иселеници од повеќе земји во Европа.
Искажуваме огромна благодарност на волонтерите на Општинската Организација на Црвениот крст од Делчево со чија што помош се реализираше оваа хуманитарна акција.
Активностите на нашето здружение на полето на хуманитарните активности ќе продолжи да се реализира и понатаму во иднина.
-информираа од здружението МЦМД “Нова зора” Делчево преку нивната фејсбук страна.
Во услови на прогресирање и продлабочување на пандемијата со Ковит-19 стандардот на населението во крајниот исток во државата се по драстично се влошува. Најмногу на удар на сиромаштијата се изложени социјално-ранливите категории на граѓани. Според состојбата на терен на која секојдневно сме сведоци се повеќе семејства преживуваат со по еден оброк на ден, живеејки во суб-стандардни животни услови.
Она што го имаме забележано на терен особено во руралните места низ целиот Брегалнички регион е состојба која што истовремено е страшна но и тажна. Живот во беда, непостоење на основни хигиенски услови, без никакви приходи со години, не ретко со влошена здравствена состојба, без струја и вода во домовите кои наликуваат на рушевини и депонии, постојат наши сограѓани кон кои ретко кој врти поглед и ја забележува нивната присутност помеѓу нас.
Овие Македонски граѓани заслужуваат поголема грижа и одговорност од целото наше општество.
Декларативните определби на секоја власт во институциите за Социјална држава мора под итно да се менуваат кон подобро со цел за поуспешно справување со сиромаштијата која го влече нашето општество кон дното.


