Од 10-ти до 12-ти август се одржа фестивал на рибата и виното на плоштадот „Под јаворите“ во Дојран. Посетителите можеа да уживаат во најпознатите дојрански специјалитети од риба и во понудата на најпознатите македонски винарии. Манифестацијата беше зачинета и со богата музичка програма.
Влатко Стефановски , Влатко Лозаноски, Љубојна, дуото „Шајн, „Џубокс бенд“ и Тајзи ја забавуваа многубројната публика. Пред завршувањето на фестивалот беа прогласени и добитниците од натпреварот во спортски риболов.
За најмалите се одржуваа и театарски претстави и детска зумба со забава на плажа и стенд ап комедија. Оваа манифестација се одржува секое лето во Дојран, почнувајки од 1976-тата година.
Секоја година е се побројна и со посетители од соседните земји.
