Од сите општини во Брегалничкиот регион, општините Кочани и Карбинци се во листата на општини со многу висок степен на даночна транспарентност. Ваквата листа е дел од извештајот на истражувањето на даночната транспарентност на општините, реализиранo со Проектот на УСАИД за зајакнување на капацитетите за искористување на ресурсите. Општините Кочани и Карбинци се во групата најтранспарентни општини со тенденција на понатамошен напредок, како резултат на политиките кои што ги спроведуваат новите градоначалници во последната нецела година..
Според индексот на буџетска транспарентност на ниво на единици на локалната самоуправа изработен од Центарот за економски анализи,Општина Кочани е на високото шесто место во групата 13 најтранспарентни општини во државата. Буџетската транспарентност за 2021/2022 во однос на претходната 2020/2021 фискална година бележи раст од два индексни поени, односно 15 од максимални 16 поени.
Даночната транспарентност на Општина Кочани е со многу висок степен на интензитет, односно измерена е транспарентност од 60 % на локалните даноци, со 20 % подобрување од минатата година.
“
Општина Карбинци е меѓу највисоко рангираните општини во државата во интензитетот на даночната транспарентност за 2022 година.
Рангирани со 60%, и пораст од 20% во однос на минатата 2021 година. 
Од последните 7 години, во 2022 година општина Карбинци има највисока ранг позиција во однос на активната транспарентност кај ЕЛС со 46.4% што е за 4,4% повисоко од 2021 година.
Транспарентно, отчетно и рационално во интерес на жителите!
Нема повеќе договори за репрезентации, луксузни трошоци и долгови како последица на недомаќинско работење!”
-информираше во јавноста градоначалникот на Карбинци Виктор Паунов во врска со ова нивно постигнување.
Во Извештајот на Проектот на УСАИД за зајакнување на капацитетите за искористување на ресурсите, Општина Кочани е издвоена како еден од добрите примери кои започнаа да ги споделуваат во живо седниците. Ваквата пракса на задолжителна јавност на седниците на општинскиот совет спроведуваат и општините Виница, Штип и Македонска Каменица преку нивните официјални канали на социјалните мрежи..
Мерењето на буџетската транспарентност на општините е извршено врз основа на степенот и начинот на достапност на документите кои се поврзани со буџетскиот процес кај секоја општина и степенот на учество на засегнатите страни во сите фази од буџетскиот процес, а нивото на даночната транспарентност е утврдено врз основа на достапноста на документи, информации и податоци поврзани со даночниот систем на локално ниво, како и со учеството на граѓаните во носењето одлуки.
