21 Ноември секоја година во Православниот календар е резервиран за верскиот празник „Св. Архангел Михаил“. Кај истоимената погребна црква во село Драмче, во делчевско овој празник во минатите години се празнуваше со посебен пиетет и посветеност од страна на жителите на селото. Оваа година на денешниот празник пандемијата со Ковит 19 си го зеде својот данок, така што во долот под драмчанските дабје тишината е единственото нешто што можеше да се наслушне. Денеска го нема големиот народен собор кај црквата “Св. Архангел Михаил”, ги нема тапаните, ќеменето, тамбурите… го немаше орото Копачка…. Само студениот ноемвриски ветер струеше низ околната корија која немо сведочи за празнилото.
Денеска во пладневните часови можеа да се забележат единствено ретки индивидуални посети на црквата од страна на верниците, со забележлива примена на протоколите за социјална дистанца. Семејните колачи, погачи, пченицата со ореви останаа на домашните трпези во слава на денешниот духовен светец.
Традицијата на жителите на Пијанец како и во селото Драмче во празнувањето на празникот посветен на Св. Архангел Михаил од памтивек е особено силна и богата. Со празнувањето на овој ден во целиот пијанечки регион се означувало крај на традиционалните масовни народни собори за тековната година по кои што се карактеризирал самиот регион. Секое населено место во регионот си има свој соборен ден кој секогаш е поврзан со одреден верски празник. На тој начин во социолошка смисла опстојувал народот на Пијанечкиот регион во заедништво со векови. Во сеќавањата на повозрасните жители на Пијанец опстојуваат кажувањата за пограничните собори кои се одржувале до пред 20-тина години на граничната линија на Македонија со Бугарија.
Самото празнување на Соборот на Св. Архангел Михаил во село Драмче во минатото беше особено живописно и богато со љубов кон традицијата и верата.
За денот на верскиот празник „Св. Архангел Михаил“ уште од претходната година се знаше кои луѓе и колку на број ќе даваат курбан.
Посетителите на курбанот како и кумовите кои даваа курбан, носеа погача, баница, туршија, сирење, салати од зелка и компир и домашна сливова или џанкова ракија, како и свој прибор за главното јадење. Секој го поставуваше својот рачно исткаен пешкир со донесените продукти и прави таканаречен колак. Тие се редеа еден до друг во трпеза, но на земјата. На местото на настанот, кумовите го подготвуваа главното јадење- курбан, кое што е во зависност од тоа дали празникот е во посен или мрсен ден. Кога се мрси секој кум си коле по едно јагне, од кое во бакарни казани се готви манастирска манџа. Таа покрај јагнешкото месо се состои и од зеленчуци: пипер; патлиџан син и модар; моркови; кромид; ориз, сол, запршка и на крајот се додава магданос. Додека кога се пости за крбан се спрема грав (боб) по стандарден рецепт и риба, со посни салати.
Членовите на ФГ „Копачка“ од с. Драмче, Делчево беа редовен посетител на овој православен курбан. Бидејки групата е формирана од играорци од оваа село, нејзините членови се заложуваат за зачувување на автентичниот начин на носење на курбан за овој ден со сите белези како некогаш. Така тие овде доаѓаат често и во народна носија, која ја препорачуваат и на другите посетители кој што располага со такви елементи да ги користи за доловување на некогашниот етно амбиент на вакви прослави.
Кога доаѓаат посетителите и гостите на настанот, влегуваат во црквата „Св. Архангел Михаил“ ја следат богослужбата и си палат свеќи за здравје. Се реди трпезата и се готви ручекот.
Кога се соберат доволно посетители, може да започне и веселењето: пеењето, играњето и музицирањето на изворни инструменти. Во овој дел водечко место го заземаат членовите на далеку познатата ФГ „Копачка“ од с. Драмче.
Откако е готов ручекот – курбан, свештеникот го осветува и благословува јадењето.
Пред да се дели ручекот се поминува со кошница во која секој става свој подарок во пари за да добие курбан.
По делењето на курбанот, се преоѓа кон општонародна веселба.
Вака било низ годините наназад.
Оваа година сето ова недостигаше. До некое наредно празнување на овој ден, останува традицијата да биде негувана во спомените на оние кои што живееле со истата…
Фото Архива од одбележување на празникот Св. Архангел Михаил од минати години
