Дополнителната заменик министерка за финансии во Техничката влада Гордана Димитриеска- Кочоска денеска упати загрижувачки информации во јавноста.
Имено таа ги информира Македонските граѓани за прифатени предлог мерки кои што ВМРО-ДПМНЕ ги упати кон владата пред повеќе од две недели, кои сега се прифаќаат со задоцнување, а истовремено актуелните предлог мерки и решенија кои што ги предлагаат од страна на опозицијата се игнорираат од претставниците на СДСМ во власта.
Ажурното и навремено постапување со добро обмислени мерки за дејствување против ефектите на актуелната криза e од особено значење со оглед на динамичната и брзата промена на состојбата со кризата на терен. Во тој поглед игнорирањето и задоцнетата реакција на власта може скапо да ги чини граѓаните како по здравјето така и во поглед на економијата, за што е потребно сите ресурси и капацитети да се стават во функција на решавање на кризата, независно што тие доаѓаат од редот на ВМРО-ДПМНЕ или било кој друг субјект. Доминантната улога на функционерите на СДСМ кои што ја имаат во власта на сите нивоа на државата не им дава за право да се однесуваат игнорантски кон предлозите на останатите субјекти во државата, најмногу поради сериозноста на состојбата.
Во продолжение во целост ја пренесуваме реакцијата на Дополнителната заменик министерка за финансии во Техничката влада Гордана Димитриеска- Кочоска:
Почитувани
Вчера се одржа Економскиот совет во владата на Република Македонија, на кој ни беше поделен материјал со предлог мерки за надминување на кризата, мерки кои ги предложи преседателот на СДСМ на 24.03.2020.
И самите знаете дека дел од тие мерки беа предложени од страна на ВМРО ДПМНЕ, уште пред повеќе од две недели. Воедно од првиот предлог на ВМРО ДПМНЕ до денес, следеа низа пресови на кои се предлагаа дополнителни мерки но сите во иста насокаn за тоа како да се надмине кризата.
Но за жал во материјалот кој што вчера го дибивме, воопшто не беа ставени предлог мерките на ВМРО ДПМНЕ (оние по кои се разликуваме со СДСМ), а на крајот на состанокот беше кажано во текот на следнава недела да се пуштат коментaри по предлог мерките на меjлот на владата. Притоа, само ќе ја потсетам владата дека на економскиот совет имаше многу предлози поразлични од тие на СДСМ, кои завршија без резултат. Сепак одговорноста при носењето на одлуките е на владата.
Морам да потенцирам дека владата и министрите наместо брзо да реагираат, користат дел од нашите предложени мерки со задоцнување од две недели. Во услови кога ни треба брза реакција ние доцниме.
Просторот нема да го користам за да образлoжувам како од блескава економија наеднаш се најдовме во незавидна положба и без финансии, но повторно ќе кажам:
ВМРО ДПМНЕ е сериозна политичка партија во која пред секое предлагање на мерки за надминување на кризата се разговара. Од таа причина мојот став не е ништо поразличен од оној на партијата.
Покрај предлог мерките на ВМРО ДПМНЕ за стопанството јас на 24.03.2020 година до министерката за финансии доставив предлог мерки за кратење на трошоци и побарав да се подготви итно ребаланс на буџетот.
И за крај на вчерашниот прес претседателот Мицкоски уште еднаш детално даде предлог мерки за надминување на кризата и подаде рака.
Ако навистина државата ни е пред се, ајде да седнеме сите заедно и да разговараме за тие мерки, во владата да си ја надминат сопствената суета и ароганција, да признаат дека е потребна помош и заедно да работиме во надминување на оваа криза.
