По брзата реакција на идентификација на локацијата на проблемот со големиот дефект на главната доводна линија за повеќе населби во Штип во присуство на градоначалникот Иван Јорданов, надлежните служби на Јавното претпријатие “Исар” од Штип работејки посветено и напорно со тешка механизација успеаа да го санираат дефектот и да обезбедат повторно вода за граѓаните во рок од помалку од 24 часови.
Доцна во ноќта градоначалникот пренесе видео записи од фактичката состојба со која се соочуваат вработените на јавното претпријатие и нивната посветена работа за да обезбедат вода за пиење за Штип во овие летни горештини.
“Почитувани мои штипјани,
Во исклучително лоши услови, на тешко пристапен терен, во екот на летните високи температури, вработените во ЈП Исар работат непрекинато веќе 20 часа, за секој еден од нас, најбрзо што е можно да добие чиста вода за пиење.
Бескрајна благодарност и поклон за овие луѓе, но и благодарност до вас мои сограѓани, за трпението кое го имате додека трае прекинот на водоснабдувањето!
Овој дефект на главната водоводна линија, уште еднаш ја потврдува потребата од искористување на средствата од самопридонесот, за целосна замена на застарената водоводна мрежа.”
-соопшти градоначалникот на општина Штип Иван Јорданов.
Од Јавното Претпријатие “Исар” Штип во чија што наделжност е работењето на водоснабдителниот систем во Штип ја објавија веста дека санацијата на дефектот е завршена и дека водоснабдувањето за штипјани пополека ќе се нормализира.
“Дефектот на главната водоводна линија за снабдување на ниска зона Ф 500 беше саниран во ноќните часови, поради постепено пуштање на системот очекуваме за кратко водоснабдувањето да биде нормализирано.”
-соопштија од ЈП “Исар” Штип.
