Регулаторната комисија за енергетика (РКЕ) утре ќе одржи состанок со работната група која работи на нова методологија за пресметка на малопродажните цени на нафтата и нафтените деривати.
Методологијата, како што информира претседателот на РКЕ Марко Бислимовски, треба да стапи во функција најдоцна до 8 мај годинава кога истекува договорот со Хеленик Петролеум, а доколку не биде донесена ќе дојде до либерализација на пазарот на нафта и нафтени деривати.
Според нашите анализи и искуството од соседните земји се покажува дека либерализацијата на пазарот ќе значи зголемување на цените во овој момент поради тоа што имаме еден учесник со големо пазарно учество. Тоа е ОКТА која во изминативе години во пазарот на големо учествува со 70 до 80 проценти.
Сметаме дека во наредниот период треба да се создадат услови да се јават и други учесници на пазарот со цел да има поголема конкуренција и да дојде до нормална и вообичаена либерализација на пазарот со нафта и нафтени деривати.
Во моментов не постојат такви услови и затоа поднесовме иницијатива до Владата за нова методологија за пресметка на малопродажните цени на нафтата и нафтените деривати
– изјавува Бислимовски на паузата на денешната подготвителна седница.
Имајќи ја во предвид фактичката состојба дека ОКТА во изминатите пет-шест години не работи РКЕ формира работна група во која членуваат претставници од Кабинетот на вицепремиерот Кочо Анѓушев, министерствата за финансии и економија и петте најголеми трговци со нафта и нафтени деривати. На првиот состанок дадовме иницијатива за измена на Законот за енергетика со која предложивме да се промени името на новата методологија која треба да ја донесеме и која ќе се однесува на определување на малопродажни цени на нафтата и нафтените деривати
– додава Бислимовски.
