Лидерот на ВМРО-ДПМНЕ Никола Груевски во Градско најави повеќе проекти кои се планираат за таа општина со што ќе се подобрат условите и квалитетот на живот на граѓаните.
-Се предвидува да се изврши санација на мост во село Уланци со што ќе се овозможи безбеден транспорт на луѓе и стока на релација меѓу селото Уланци и Градско. Ќе се изврши и реконструкција на локалниот пат Градско – село Долно Чичево во должина од 1 километар. Истовремено, се планира изградба на алтернативен план за село Уланци како и реконструкција и проширување на локалниот пат за село Виничани, најави Груевски.
Истакна дека предвидена е реконструкција на улицата Илинденска во Градско, како и асфалтирање на улиците, „Александар Македонски“, „Панко Брашнаров“ и „Питу Гули“.
Груевски посочи и дека предвидено е да се асфалтираат улиците во Виничани, Кочилари, Уланци, Ногаевци и Стопанство.
-Предвидуваме систем за технолошка вода во село Виничани која ќе се користи за наводнување на раноградинарски култури по дворовите. Ќе се реконструира и дел од водоводната мрежа од бунарите во село Уланци до Градско. Ќе го санираме и резервоарот за вода за Градско. Исто така, планираме изградба на канализација во населеното место Стопанство и во селото Долно Чичево, истакна Груевски.
Посочи дека ќе се изврши изградба на тротоар и паркинзи во централното градско подрачје на Градско со што населбата ќе добие нов урбан лик.
-Планираме и изградба на нова индустриска зона и можност на развивање на бизнис секторот и отворање на нови работни места овдека во Градско. Во насока на зголемување на капацитетите за згрижување и воспитување на деца од предучилишна возраст планираме отворање на две детски градинки во општината Градско со што капацитетот ќе се зголеми за 100 дечиња, најави Груевски.
Нагласи дека за полесен пристап на земјоделците до своите површини, но и поради заштита на механизацијата ќе се изврши тампонирање на пристапните патишта.
-Гаранција за сето ова е ВМРО-ДПМНЕ и секако Жанета Чаушевска и советниците. Таа се трудеше и работеше и даде максимум во една општина кој има многу малку приходи. Навистина кога имате општина која што е рурална и која има многу потреби, да имате толку малку приходи е вистинска умешност да се изјадат и да се задоволат приоритетите. Таа се трудеше и работеше, го даваше максимумот, општината кога ја презедовме беше презадолжена и онолку колку се дозволуваше со домаќинско работење, се создаваше и се градеше. Со нејзе сте на сигурно, посочи Груевски.
На жителите на Градско лидерот на ВМРО-ДПМНЕ им порача дека доколку ја одберат Чаушевска и советниците, на чело со носителот на листата, Виолета Марчева, ќе ја одберат вистинската страта и тимот кој навистина работи.
