Претседателот на Општинскиот комитет на ВМРО-ДПМНЕ од Штип ја алармира јавноста во Штип и во државата за неразјаснето визуелно видливо загадување на воздухот во Штип.
Иван Јорданов и повикува надлежните да соопшштат во јавност за што точно станува збор и да го идентификуваат сторителот на ова загадување.
Во продолжение ја пренесуваме интегрално неговата реакција пренесена преку социјалните мрежи:
Што се случува со воздухот во Штип? Кој го загадува? Зошто надлежните молчат?
Веќе втор ден граѓаните на Штип може да забележат сиви облаци со чад проследени со чудна миризба во градот и околината на Штип. Дека има загадување покажуваат и мерните станици за квалитет на воздухот, кои во дадени моменти измеруваат и до 120 микрограми штетни PM 10 честички. Ваквата состојба сериозно ги загрижува граѓаните на Општина Штип и истите отворено прашуваат дали можната причина за загадувањето е воениот полигон Криволак или пак се работи за некој трет загадувач?
Она што уште повеќе загрижува е односот на локалната и централната власт. Истите иако знаат дека има загаденост на воздухот за тоа упорно молчат и не даваат конкретни информации за што всушност станува збор. Во летен период кога не се очекува загадување на водухот, ваквото големо количество на PM 10 честички претстаува сериозен аларм. Неажурноста на властите и немањето коментар од нивна страна уште еднаш ја потврдува нивната незаинтересираност за општото здравје на граѓаните. Јавно ги повикуваме надлежните служби да истражат за што точно станува збор и да ги информираат граѓаните.
Исто така ги повикуваме надлежните да ја утврдат одговорност за загадувачот и за истиот да превземат соодветни законски мерки како би спречиле понатамошно изложување на граѓаните на опасно загаден воздух.
