На денешната прес конференција од партиското седиште Потпретседателот на ВМРО-ДПМНЕ, Александар Николоски ја алармираше јавноста за огромната катастрофа која ја снајде македонската металуршка индустрија со одредувањето на квоти за извоз на челик, железо и производи од нив во земјите на ЕУ, после кои квоти за испорачаните количиниќе се плаќа 26% данок.
Деновиве пред крајот на оваа лоша и црна година за Македонија стигна можеби најлошата вест за македонската економија. Имено Европската Унија воведува т.н. заштитни мерки за увоз на производи од челик, алуминиум и железо со кои е опфатена и Република Македонија. Со истите се воведуваат квоти за извоз на овие производи во ЕУ кои откако ќе бидат исполнети воведува царина од дури 25%. Ова народски кажано значи воведување на санкции кон Македонија и останатите земји кои не се членки на ЕУ во делот на извоз на челик, алуминиум и железо како и производи од истите. Ова е драматичен удар за македонската економија што на виделина ја исфрла целосната неспособност на Владата на Заев, Димитров, Шекеринска и Анѓушев. Имено оваа четворка не направи ама буквално ништо Македонија да биде изземена од овие мерки на ЕУ.
За информација на граѓаните металуршката индустрија е еден од најголемите извозници и на неа се потпира голем дел од бруто домашниот производ како и економскиот раст. Неколку бројки. Вкупниот извоз кон ЕУ е преку 200 милиони евра годишно и секоја година расте со стапка на раст од 15%. Уделот на овие производи во БДП на Македонија е 1,6% во 2017 година, а очекувано е во 2018 година да биде 1.8% од БДП. При економски удар и стопирање на извозот што е се поизвесен за жал на овие производи, нереализирани ќе останат околу 200 милиони евра во 2019-та година. Тука би сакале да ги коригираме проекциите на Владата кои што велат дека штетата ќе биде околу 100 милиони евра. Штетата ќе биде 200 милиони евра, директна во капацитетите кои произведуваат, како и индиректна во компаниите кои произведуваат како и индиректна во комапниите кои што ги опслужуваат. Се на се во 2019 година може да се очекува колапс на оваа индустрија и околу 5.000 луѓе да останат на улица. Овие 5.000 луѓе ќе бидат или пратени на принуден одмор со намалена плата или целосно ќе ја изгубат својата работа, а фирмите ќе се соочат со проблеми во својата ликвидност, кампањско производство наместо годишно, неспособност да ги враќаат кредитите како и целосно запирање на планираните и идни инвестиции во развој што на среден рок ќе ги направи неконкурентни дури и без постоење на вакви квоти односно санкции. На тоа се додава и проблемот во делот на производство на цевки каде годишниот извоз на Република Македонија е 180.000 тони, а максимално дозволената квота е 110.000 тони, што ќе биде директна загуба од 45 милиони евра во оваа индустрија. Ако на ова се додадат истрагите на ЕУ за продажба по т.н. дампинг цени, тогаш штетата во делот на производството на цевки може да е уште поголема.
-соопшти Николоски по што направи практична илустрација за тоа што ова би значело за Македонската економија:
.Да го преставиме сето ова илустративно – штета од 200 милиони евра е годишна бруто плата за околу 29.000 работници! Значи штетата која што ќе се случи следната година е во вредност од годишни плати на 29.000 работници во Република Македонија.
Потоа потпретседателот на опозициската ВМРО-ДПМНЕ предложи план за кризен менаџмент за надминување на ваквата погубна состојба која се надвиснува над Македонската економија:
Итно ја повикуваме Владата да преземе неколку мерки:
-Прво, да формира кризен штаб со претставници на Владата и компаниите кои се најзасегнати. Проблемот да се решава на највисоко ниво, а недозволиво е да се решава на ниво на Вице Премиер за евроинтеграции, потребно е целата Влада да се вклучи во решавање на проблемот.
-Второ, да воведе даночни олеснувања за овие компании.
-Трето, да воведе олеснувања во делот на придонесите за здравствено, пензиско и персонален данок за работниците од овие индустрии како не би ги изгубиле своите работни места.
-Четврто, премиерот лично да тргне од главен град до главен град на земјите членки на ЕУ да се среќава со сите што ќе го примат и да моли овие квоти да не важат за Македонија. Во земјата да се врати само кога ќе ја заврши работата.
Исто така сите кадровски и стручни потенцијали на ВМРО-ДПМНЕ стојат на располагање и ги нудиме како такви да и помогнеме на владата.
Петто, да формирање на тело составена од претставници на владата и најзегнатите компании кои што активно и итно ќе почнат да бараат нови пазари за овие производи како загубата би била што помала.
Кризата е пресериозна, неспособноста на Заев, Шекеринска, Димитров и Анѓушев преголема, што е причина плус да заминат ден поскоро како не би настапило целосно црнило не настапило во македонската економија.
-го заврши своето обраќање Александар Николоски.
