Татко на пет деца, со болна сопруга со инвалидитет е гевгеличанецот Перо Рујковски. Иако внимавал на сите мерки за заштита од Ковит-19 сепак некако се заразил со вирусот. И тука започнала неговата најтешка животна битка за неговото здравје.
Цели 25 денови имал обилна пневмонија каде секој миг се борел за својот здив. Откако успеал да заздрави од болеста бил испишан од гевгелиската болница, но овде неговата голгота на престанува.
Поради семејната сиромаштија овој Македонец нема пари да си ги купи лекарствата за да ја доврши препишаната терапија која е неопходна за да може некако да се поврати во подобра здравствена состојба.
“И јас сум еден од многуте кои директно се соочија со оваа страшна болест. Морам да кажам дека навистина ги почитував сите мерки за заштита од корона вирусот, но бидејќи мојата сопруга е лице со инвалидитет, а имаме пет деца, јас сум тој што мора да ги завршува сите работи. И да пазарам, и да одам по други набавки и децата да ги снабдам со сè што треба. Веројатно, некое мое мало невнимание беше доволно да се заразам. Здравствената состојба ми стана толку тешка што мораа да ме хоспитализираат. Имав обилна пневмонија и цели 25 дена останав на лекување во гевгелиската болница. За терапијата и лековите што да ви кажувам. Секојдневно примав по цела рака лекарства и инфузии. Во мојот случај се покажа дека сè беше делотворно и успеав да го надминам најтешкото. Бев испишан на 9.декември и сега тоа е минато. Сега имам друг проблем, а тоа е што не можам да си ги купам лекарствата кои се уште морам да ги пијам, прескапи се,”
-ни се обрати овој Македонец со апел да ја пренесеме неговата порака до секој хуман Македонец да му помогне со финансиски сретства за да може да си ги купи лекарствата, со што ќе продолжи да се грижи за своите пет деца и сопруга-инвалид.
Секој хуман Македонец кој што е во можност апелираме да донира финансии на трансакциската сметка на Перо Рујковски, за да може да си ја купи толку потребната терапија.
