Денеска од Кочани претседателот на ВМРО-ДПМНЕ, Христијан Мицкоски упати своја поддршка за протестите кои што од денеска ги започнаа вработените во образованието.
Претседателот на најголемата парламентарна партија побара од власта да ги прифати барањата на синдикатот за образование и вработените во секторот образование за нивелација на нивната плата согласно постојните законски основи, пред се заради зачувување на достоинството на образовните работници кои што се еден од општествените столбови во Македонија
“Да се прифатат барањата и да се нивелираат примањата на работниците, затоа што навистина тешко се живее, затоа што инфлацијата е огромна. Инфлацијата минатиот месец е 8,8% на годишно ниво и тоа е навистина е една исклучително висока стапка која што ќе ги надмине сите проекции кои што претходно оваа некредибилна влада ги предвидуваше. Граѓанинот се осиромашува, паричникот е се потенок, тешко се живее, одвај крај со крај се врзува и затоа, наместо да имаме богата Влада сиромашни граѓани, треба да имаме избалансирана состојба во државата, односно Влада која што работи да го подобри стандардот на граѓаните. Затоа, веднаш и под итно да се врати законот во собраниска процедура за зголемување и нивелирање на платите согласно коефициентот на сложеност на работното место и оваа самобендисана Влада да го прифати предлогот на опозицијата и предлогот на синдикатите, ова го гледа како единствен излез од социјалниот притисок кој што и престои на владата како резултат на денешниот штрајк на вработените во образованието.
Како опозиција предупредувавме дека ќе дојде до ова ситуација и затоа, до собрание го предложивме законот за нивелирање на платите, но од, некредибилната власт, нема кој да слушне, како советите на опозиција, така и барањата на работниците, преку разните синдикални здруженија.
Тогаш предупредувавме дека до ова ќе дојде, но за жал, во оваа некредибилна влада нема кој да го слушне гласот на народот и токму поради тоа им се случуваат такви дебакли, како што се случија на два пати на локалните избори, а тоа ќе им се случи на, порано или подоцна, предвремените парламентарни избори кои што ќе се одржат. На народот, едноставно, му е преку глава од неспособни политичари, политичари кои што водат сметка само за личните буџети, а не водат сметка за стандардот на работникот, на граѓаните. и затоа ни се случуваат овие социјални немири. Ако го послушаа советот од ВМРО-ДПМНЕ, денеска ние немаше да ја имаме оваа ситуација, но за жал, тие одлучија да се однесуваат така како што се однесуваат изминативе четири и половина години“.
-соопшти Христијан Мицкоски од Кочани.
Притоа додаде дека, од она што го слуша на терен, допрва ќе има социјален немир и социјални штрајкови, ако владата не им излезе во пресрет на работниците.
Целата изјава на Претседателот на ВМРО-ДПМНЕ од денешниот настан во Кочани ја пренесуваме во продолжение:
