Претседателот на ВМРО-ДПМНЕ Христијан Мицкоски попладнево имаше свое обраќање на настанот за промоција на Дејан Владев како кандидат на ВМРО-ДПМНЕ за градоначалник на Свети Николе на претстојните локални избори во месец октомври.
Мицкоски пред жителите на Свети Николе зборуваше за неприликите во кои што е впуштена цела држава а воедно и граѓаните на Свети Николе под власта на Зоран Заев и СДСМ во изминатите повеќе од 4 години.
Токму затоа Мицкоски го стави акцентот на претстојните избори како клучни во процесот за пад на актуелната власт.
“Ова не се обични избори, ова не се обични локални избори. Да, бираме советници, бираме градоначалник на Свети Николе, но тоа што ќе го избереме на 17-ти октомври, а онаму каде што нема да ја завршиме работата на 17-ти октомври, на 31 октомври, е практично патеката по која што бираме да оди Македонија во иднината.
Дали сакаме да останеме овде каде што сме, на дното, на дното по економијата, на дното по инвестициите, а на врвот по криминалот и корупцијата, на врвот по младите кои што се иселуваат и по белата чума која што владее насекаде во Македонија. Или сакаме да изберем просперитет, надеж и иднина за нашите најмлади, за оние средовечните, но и оние што се во поодминати години кои што веќе чекорат кон пензионерските денови.
Јас знам и убеден сум дека изборот во повеќето општини, а Свети Николе е таква општина каде ќе биде токму ова второто, надеж, иднина, просперитет. Тоа е она кое што се бориме, и тоа е она за кое што работиме целиот овој период.”
-рече Мицкоски од градскиот парк во Центарот на Свети Николе.
“За тоа 17-ти октомври е последниот ден на пресметката со оваа тиранија и нивните слуги кои што се денешна македонска реалност. А, јас ви ветувам, јас ви ветувам и ве гледам во очи дека веднаш после победата на локалните избори следува ново парламентарно мнозинство, нова Влада, и посветли денови за нашата Македонија. Денови на работа, денови на реформа, денови на благосостојба, и денови на чесни и честити луѓе кои што ќе ја поведат Македонија онаму каде што и е местото. Јас ви го ветувам тоа.
На овие избори, почитувани светиниколчани, излегуваме со јасна програма за јасна иднина. Програма каде што ќе бидат опфатени илјадници проекти на локално ниво, но ќе има и такви кои што ќе бидат заеднички за целата наша Македонија. И проекти кои што најголем дел потекнаа од вас, од народот во тие средби кои што ги имавме во нашата пред предкампања, бидејќи ако ова го оквалификувам како кампања односно нејзината предкампања тоа се прокети кои што ги слушнавме лице во лице од вас. Голем дел од тие проекти, се разбира за оние кои што имаат можности ги ставивме во програмата со која што ќе искочиме во секоја една општина, пред граѓаните и со тоа ќе се обидеме да ја добиеме нивната доверба.”
-зборуваше Мицкоски пред светиниколчани.
Тој исто така упати пораки до јавноста на Свети Николе зошто Дејан Владев треба да биде новиот градоначалник на Свети Николе:
“Дејан Владев е скромен човек кој го сака Свети Николе. Човек работник, човек со визија и план. Дајте шанса на напредокот, на иднината, на луѓето кои допрва го имаат својот збор во политиката.
На 17 октомври да свртиме нова страница и да испишеме заедно нови успеси, развој решенија и иднина за подобар живот. Затоа што животот нема враќање, и сите заедно да се бориме за она што ни е важно за нашите животи. Нашите семејства, нашите домови, нашите општини. Нашата Македонија!”
-рече Мицкоски.
Целото обраќање на Претседателот на ВМРО-ДПМНЕ може да го проследите во видеото во продолжение:
