Од 06.04.2020 година вработените во општина Делчево добија нов распоред на работа.
Со известување градоначалникот Горан Трајковски ги информираше вработените да се јават на своите работни места од 07.30 часот иако претходно важеше претходно донесена одлука со која беа воведени дежурства во општината со пграничен број на вработени во службените простории на општината.
Во врска со оваа состојба како интернет портал го упативме следното прашање до градоначалникот Трајковски:
-Дали сметате дека со ваквото известување/наредба е или не е во согласност со препораките на Владата, со оглед на тоа што работните места на вработените во општина Делчево не ги задоволуваат пропишаните растојанија согласно препораките на владата и постои висок ризик за трансмисија на вирусот Ковит-19?2?
-на кое го добивме следниот подолг одговор од општината:
“Согласно со Одлуката за изменување на Одлуката за забрана на посебен режим на движење на територијата на Република Северна Македонија, Уредбата од Владата на РСМ за Законот за работни односи и член 12 и 13 од Колективен договор на гранскиот синдикат за член 95 од Законот за административни службеници (Службен весник на Република Македонија бр.27/2014, 199/2014, 48/2015, 154/2015,5/2016 и 11/2018 и Службен весник Република Северна Македонија нр.275/2019 и 14/2020), член 137 од Законот за работни односи-Пречистен текст („Службен весник на Република Македонија бр.74/2015“) и согласно член 11 и член 12 од Грански колективен договор за органи на државната управа, стручните служби на Владата на Република Северна Македонија, судовите, јавните обвинителства, казнено-поправните и воспитно-поправните установи, државното правобранителство, општините, Градот Скопје и општините на Градот Скопје, агенциите, фондовите и другите органи основани од Собранието на Република Северна Македонија (Службен весник на Република Северна Македонија бр.51/2020), вработените се должни да го искоритат вториот дел од Годишниот одмор од 2019 година.
Според Планот за неискористен втор дел од годишниот одмор за 2019 година, 52 лица вработени во Општина Делчево треба да го искористат вториот дел од годишниот одмор во текот на месец април 2020 г.
Согласно мерките и препораките за вработени кои имаат деца до 10 –годишна возраст, вкупно 5 вработени ја користат оваа мерка, а 2 лица користат мерки од Владата по основ на хронична болест.
Од тие причини, а со цел да не се наруши тековното работење на Општина Делчево се изработува нов распоред на работа.
Воедно, напоменуваме дека согласно со Препораките од Владата на РСМ за секој вработен се обезбедени заштитни средства, маски, ракавици и гелови за дезинфекција на рацете, а се врши редовна дезинфекција на работните простории на Општина Делчево и се запазува предвиденото растојание. Исто така, работата со странки е минимизирана, а комуникацијата се изведува по телефон или електронски за што благовремено се известени граѓаните преку јавните гласила и преку претседателите на месните и урбаните заедници.”
Дополнително од страна на дел од вработените во општина Делчево добивме информација дека просторните услови за работа и бројот на вработени во канцелариите не соодветствуваат на препораките на Владата од минимум 1.5-2.0 метри растојание меѓу вработените, и дека се загрижени за своето здравје и здравјето на сите вработени во општината.
Во контекст на овој споменат проблем упативме и второ прашање до Градоначалникот Трајковски:
Која е причината да се преиначи претходно воведената мерка од страна на општина Делчево за воведување на дежурства во општината, особено сега кога се заоструваат рестриктивните мерки од страна на Владата?
При што го добивме следниот одговор:
Аналогно на горенаведеното, се наметнува нов распоред за работа на вработените. Првично воведените дежурства по одделенија, со оглед на новата состојба, се укинуваат, а во одделенијата во Општина Делчево ќе работат лицата кои го искористиле одморот, односно се прави нов распоред за работа. Работното време на општинската администрација од утре, 8.04.2020 започнува од 7,30, а завршува во 14,00ч. дежурства.
Од почетокот на појавата на заразата Ковид-19, Градоначалникот на Општина Делчево презема низа мерки за зачувување на јавното здравје на граѓаните, а со тоа и на вработените во ЕЛС Делчево.
