Осветлувањето на јавните површини е една од основните ингеренции на работата на општинските самоуправи во функција на граѓаните. Одржувањето и модернизирањето на системот на уличното осветлување е значаен предизвик особено за помалите општини кои што имаат финансиски проблеми во своето работење. Одреден број на општини имаат склучено договори со специјализирани економски оператори за одржување на уличното осветлување, додека помал број на општини одржувањето го вршат во рамки на комуналните претпријатија.
Една од поразвиените општини во поглед на управувањето со уличното осветлување е општината Македонска Каменица каде што управувањето е доделено на фирма-специјализиран оператор за оваа дејност. Во насока за обезбедување на дополнителна заштеда на буџетски пари градоначалникот на општина Македонска Каменица Димче Атанасовски реализираше состанок со фирмата-оператор за одржување на јавносто осветлување при што беа донесени повеќе заклучоци за понатамошно реализирање:
“Одржавме работен состанок со претставници од Телеком – компанија со која Општина Македонска Каменица има повеќегодишен договор за одржување на веќе поставеното енергетски ефикасно јавно осветлување.
Разговаравме за можностите за унапредување на услугата и за остварување на дополнителни и поголеми заштеди, имајќи во предвид дека цените на електричната енергија се екстремно високи.
Утврдено е дека најголем проблем ни е старата и дотраена подземна електрична инсталација, како и постоечкото осветлување на спортските терени и дел од објектите на јавните установи и институции.
Како Општина која домаќински и одговорно ги троши буџетските средства, веднаш ќе се насочиме кон решавање на овие проблеми, а заштедата која ќе ја оствариме, ќе ја инвестираме во проекти од јавен интерес.”
-соопшти Димче Атанасовски- Градоначалник на општина Македонска Каменица.
