“Сите сме родољупци, или странски кажано патриоти, а патриотизмот, поточно родољубието најдобро се покажува преку негувањето на јазикот.
И покојниот Блаже Конески ќе речеше “Јазикот е нашата најширока татковина“ .Мајчиниот јазик е тој што не дефинира, и сечиј јазик е рефлекс на менталната структура на еден народ, постоењето на суфикси и префикси, усложнувањето на префиксите во нашиот јазик е само уште еден доказ дека нашиот јазик е многу богат, а ние сами го осиромашуваме. Ако некој сака да се покаже како голем родољубец треба да е голем познавач на македонскиот јазик, јазикот е дефиниција на човекот, и за да го запознаеш еден човек, треба да зборуваш со него“
– порача нашата поетеса, критичар, раскажувач Љубинка Донева, која токму во Виница го одбележа Денот на мајчиниот јазик-21 февруари.
“Ако нејзиното име доаѓа од љубовта, ако во неа се крие секој неоткриен збо кој никој друг немал сила да го каже, да го искаже, ако таа е она која непремолчено, гордо и без размислување зборува за она кое никој друг не се дрзнал да проговори……Користејќи ја силата на зборот на сеуште најсилното оружје кое го изумило човештвото, создавајќи песни кои пред нас откриваат еден поинаков, различен светоглед на се она што го гледаме, а не го забележуваме, таа едноставно длабоко продира во душата на секој од нас кој избрал да е обдарен со душа“
– истакна професорката Тања Анакиева Давитковска.
Поетската средба во Библиотеката во Виница, беше ретка можност присутните да се запознаат со творештвото на Донева, но и да уживаат во прекрасните стихови поезија.
Таа во својот долгогодишен творечки опус кој продолжува и по пензионирањето, има повеќе збирки поезија (“Длабока соба“; “Мојата азбука“; “Детаљи во светоста“)“ како и поезија за деца. Автор е на книгата раскази за деца “Царка ветерка “, дел од нејзината поезија е препеана и на други јазици.
Поетската средба по повод Денот на мајчиниот јазик , беше во организација на Библиотеката “Ванчо Прќе“.
