Градоначалникот на општината Чешиново-Облешево Горанчо Крстев бил дијагностициран за позитивен на Корона вирусот.
Тој имал контакт со починатиот бербер од Кочани кај кого исто така имало дијагностицирано присуство на Корона вирус.
„Точно е дека на 23.март бев кај сега починатиот бербер, но до 1.април никој не знаеше дека тој е заболен од коронавирус. Кај него не само јас, туку биле многу други муштерии и во следните денови. Уште дента кога дознавме, закажавме тестирање во ‘Аџибадем Систина’ каде што јас и мојата сопруга бевме негативни. На 6.април направивме уште едно тестирање во ‘Жан Митрев’ и на тој тест излеговме позитивни“ – вели градоначалникот Крстев за Инфомакс.
Тој додава дека уште веднаш откако ги добиле резултатите се ставиле во самоизолација.
„Јас и мојата сопруга заедно со моите деца уште веднаш се ставивме во самоизолација. Од вчера никој не излегол од дома. Јас уште веднаш дадов налог општинската зграда да се затвори, а вработените да се јават на доктор за понатамошни инструкции. Ова го пријавив и во Институтот за јавно здравје. Се е по процедура“ – тврди градоначалникот.
Тој ги демантира шпекулациите дека членови на неговото семејство се движеле слободно откако дознале дека се позитивни на КОВИД-19.
„Утре ќе се тестирам во државното здравство. Во 8.30 имам закажано тестирање. Ќе се тестираат и моите деца, и ќе бидеме сите во изолација 14 дена. Нема светот да престане ако сме 14 дена во изолација“ – додава тој.
Притоа денеска со свој повик во јавноста излезе и докторката Јасминка Ајтовска која ги повика сите кои имале контакти со Градоначалникот или со некој од вработените во општината да се јават кај својот матичен лекар за понатамошни анализи.
Почитувани сограѓани на општина Чешиново-Облешево…секој од Вас кој последните 10 дена бил во контакт со Градоначалникот или со некој од вработените на општината…да се јави кај својот матичен лекар за понатамошни инструкции и лична заштита. Да не се создава паника…Заболени од коронавирусот нема, но има позитивни од општинската зграда кои се без симптоми! Со почит, д-р Јасминка Ајтовска.
