По повод 8 Септември- Денот на независноста на Република Македонија членовите на општинскиот комитет на ВМРО-ДПМНЕ од Делчево во јавноста упатија честитка по повод празникот.
“Почитувани граѓани на Делчево,
Ние не сме држава на слободни граѓани. Слободата подразбира иницијативност која мора да ја бараме во секој од нас, да ја разбираме и да ја ползуваме. Дали ќе останеме незаинтересирани и фрустрирани, или ќе бидеме напредни, прогресивни и силни од самите нас зависи. Од никој друг. Мора да сме слободни граѓани во слободна земја. Нашите одлуки самите ги донесуваме. За нашата иднина сами одлучуваме, не одлучува Белград, Софија или Цариград. Одлучуваат граѓаните на Република Македонија. Самите Ние.
Успехот на секој од нас е резултат на сопствените залагања. Една единка може да ги промени работите. Реалноста се менува. Потребен е само многу труд и многу верба.
Почитувани граѓани на Делчево…
На ова парче земја од секогаш живееле различни нации, се испреплетувале различни религии и егзистирале различни културни поимања и вредносни определби, но секогаш овде живееле луѓе.
Секое големо достигнување, пред да се оствари, е само сон. Независна, суверена и слободна Македонија, беше сонот на генерации и генерации, наши претходници.
Успеавме во 1991 година, кога сонот стана јаве.
Треба да знаеме кои сме, за да знаеме што сакаме да бидеме.
Треба да знаеме каде сме, за да знаеме каде сакаме да бидеме.
Треба да знаеме што имаме, за да знаеме што сакаме да стекнеме.
Од името на Претседателот на ОК на ВМРО-ДПМНЕ Делчево – Иван Гоцевски,
Од името на сите членови на ОК на ВМРО-ДПМНЕ Делчево, од името на сите активисти и симпатизери на ВМРО-ДПМНЕ и МАКЕДОНИЈА, посакуваме…
Да живее Македонија!
Да сте здрави и живи, да бидете на добра мисла и со храброст Македонска во срцата!
Бог да и помогне на Македонија!
Среќен роденден татковино, среќен роденден Македонијо!!!
-стои во честитката по повод 8 Септември- Денот на независноста на Република Македонија на членовите на Општинскиот комитет на ВМРО-ДПМНЕ од Делчево.
