Во организација на Националната мрежа против хомофобија и трансфобија денеска во Скопје се одржа втората по ред парада на гордоста (Скопје Прајд) под слоганот “Вон ѕидовите”.
Парадата започна од кај паркот Жена- Борец пред Македонскиот парламент, со движење по улиците низ центарот на Скопје, пред платото на Владата и заврши во Градскиот парк кај летната сцена “Школка” каде имаше повеќечасовна музичка програма.
Поддршка за настанот даде Зоран Заев преку своја порака на фејсбук во која меѓу другото напиша:
“ЛГБТИ заедницата ја има владината и мојата поддршка за каузата која значи еднаквост и која последните четири години слободно се манифестира во нашето едно и еднакво општество, а на јавните простори во Скопје и со организацијата на SkopjePride.”
На парадата можеа да се забележат и Стево Пендаровски заедно со неговата сопруга, Радмила Шеќеринска, Мила Царовска, Јагода Шахпаска, Ирена Стефоска, Роберт Алаѓозовски…
Повеќе граѓани на парадата носеа транспаренти со пораки и знамиња во боите на виножитото.
