На денешната прес конференција Генералниот секретар на ВМРО-ДПМНЕ, Игор Јанушев ја алармираше уште еднаш јавноста за политичкиот прогон што го прават институциите под контрола на СДСМ врз политичките неистомисленици од опозицијата.
Овојпат тоа власта го прави со бркање од работа на членот на Извршниот комитет на ВМРО-ДПМНЕ, Цветан Трипуновски.
Во продолжение во целост ја пренесуваме прес конференцијата на Игор Јанушев:
Република Македонија е единствената држава во Европа во која се води постапка против најголемата опозициска партија и во која што политичкиот прогон станува основен начин на делување на власта.
Република Македонија е единствената држава во Европа каде што поранешни функционери се испраќаат во притвор врз основа на фабрикувани службени белешки, а се носат пресуди какви што ќе нарача премиерот кој што три пати претходно е аболициран за тежок криминал.
Наместо да оди напред, со секој изминат ден со однародената и криминогена и црна власт, Република Македонија оди назад и се оддалечува од европските стандарди.
Во Република Македонија криминогената власт го узурпира целиот систем и ги злоупотребува институциите за политички пресметки.
Република Македонија и официјално е држава во која што се бркаат луѓе од работа само заради тоа што имаат различен политички став од криминогената власт.
Република Македонија е земја во која што се делат откази само заради укажување nа лошите политики на актуелната власт.
Последниот пример е отказното решение со кое што му е прекинат работниот однос на Цветан Трипуновски, државен советник во Министерството за земјоделство, шумарство и водостопанство.
Цветан Трипуновски е избркан од работа само заради тоа што е член на Извршниот Комитет на ВМРО-ДПМНЕ и заради тоа што во име на партијата јавно изразуваше сомнеж дека актуелната политика на власта оди на штета на земјоделците.
Цветан Трипуновски не е избркан од работа заради тоа што не ги исполнувал службените обврски, туку избркан од работа заради тоа што надвор од работното време како член на ВМРО-ДПМНЕ ги презентирал партиските ставови со кои што се укажува на пропустите на актуелниот министер и се предлагаат мерки со кои би се подобрил статусот на земјоделците.
Цветан Трипуновски е избркан од работа бидејќи на 24-ти август укажал дека повеќе од 20.000 тони сливи скапуваат, а земјоделците се соочуваат со егзистенцијална криза и побарал откупна цена од 12 денари за килограм.
Цветан Трипуновски е избркан од работа бидејќи на 19-ти септември укажал на штетата од изјавите за производство и продажба на ГМО ориз без конечни анализи.
Токму овие две прес конференции се официјално наведени во образложението врз основа на кое е изречена дисциплинска мерка престанок на работниот однос. Да биде апсурдот уште поголем, прес конференциите не се држени во работно време, туку по завршување на истото. За ова може да посведочите и вие како медиуми.
Ова го нема ниту во најмрачните и најдиктаторски држави. Се брка човек од работа со апсурдно образложение дека бил главен наратор на прес конференција и како претставник на политичка партија нанесува директна штета врз угледот на институцијата и ја поткопува довербата во администрацијата.
Вистината е една. Оваа криминогена власт е неспособна да направи било што позитивно. Аболицираниот Заев и неговиот послушник министерот Љубчо Николовски го клекнаа земјоделието на колена и го урнаа стандардот на земјоделците.
За да добијат гласови лажеа дека ќе обезбедат сигурен откуп на земјоделските производи, а сега земјоделските производи скапуваат по нивите. Црнилата кои ги донесоа Заев и Николовски ги осетија и производителите на јаболка, сливи, бостан, пченица, зелка, домати, ориз итн. Нема гранка која што не трпи штети од криминогената власт.
Сега мислат дека со репресија и сеење страв ќе ја замолкнат критиката.
Ние имаме само едно да им порачаме, одете си со арно додека сеуште не е доцна. Не заплашувате никого. Не ги заплашувате ниту земјоделците, а уште помалку успевате да не заплашите нас. Одете си пред да направите штети кои нема да може да се надоместат!
ВМРО-ДПМНЕ ќе ги искористи сите правни средства против политичкиот реваншизам на власта, и сите кои ги злоупотребуваат институциите за политички пресметки ќе одговараат.
