Вчера недела (17.11.2019 година) во Жена-паркот пред Македонското собрание кај споменикот на децата бегалци од граѓанската војна во Егејска Македонија се одржа комеморативен протест против бришењето на Македонската историја.
Повод за ваквиот настан беше кршењето на информативната табла на овој споменик кој ги симболизира маките и страдањата на Македонцети кои беа прогонети од грчките кралски сили потпомогнати од британските воени сили во периодотза време на Граѓанската војна во Грција 1946-1949 година.
Професорката Виолета Ачкоска која беше присутна на протестот упати громогласна порака преку социјалните мрежи која ја пренесуваме во целост:
Го креваме гласот против вандалскиот чин на скрнавење на македонскиот непребол!
Сè уште горат солзите на мајките од чии прегратки во 1948 година, за време на Грчката граѓанска војна беа одземени децата. Исплашени, голи, боси колони, гладни и жедни тргнаа во нов живот, со надеж дека повторно ќе се вратат во своите домови. Беа одведени на различни страни, разделени брат со брат, сестра и брат, во домови за сирачиња и прифатилишта. Илјадници растурени семејства, срушени куќи, оскрнавени гробови и цркви. Остана само таа голема беломорска тага, копнежот на децата за мајкината прегратка и болката на мајките од кои повеќето уште еднаш не го помирисаа топлиот здив на своите чеда и не се вратија на прадедовскиот праг. Ех наша Македонијо! Не успеавме да те помакедончиме! Ранета лежиш во претсмртен грч, а рамнодушноста се вгнезила во срцата во кои можеби некогаш имало некое жарче.
-напиша на фејсбук Виолета Ачкоска.
