„Ако до скоро, битката на градските татковци и мајки беше битка за што повеќе асфалтирани улици; за доволно многу згради и станови; за паркинзи и плочници, денес, би требало да биде и битка за подебели сенки, за што повеќе природни убавини, како и ЗА паркови и градини“.
Со оваа порака, во пресерет на поредните локални избори, Здружение КАЖИ КОГА Скопје и Регионален центар за застапување Делчево (РЦЗ) им се обратија на локалните власти и на граѓаните на Скопје и Делчево. Двете здруженија, со финансиска поддршка од Амбасадата на САД во земјата започнаа со активностите на проектот „Наш град“.
Проектот е посветен на промоција на акции за трансформација на урбаните јавни површини во зелени, функционални и одржливи простори, како и мотивирање на жителите на двата града за поголема вклученост во организирањето и одржувањето на урбаните јавни простори, особено на запуштените тревници, паркови, игралишта и сл.
Проектот ќе се спроведува во Делчево и Скопје до 20 август 2022 година. Здруженијата ќе бидат активни во три населби на Делчево, па следете ги на социјалните мрежи и вклучете се и вие во нивните дискусии и пораки за подобро и поубаво Делчево.
Погледнете ја првата нивна видео порака на еден од иницијаторите на урбаната, општествена градина „Бостание“, со која сакаат да ве инспирираат на слични акции низ Делчево и околината.
