До нашата редакција пристигнаа информации кои што говорат за лошата финансиска состојба во која се наоѓа Јавното комунално претријатие “Брегалница” Делчево која е резултат на лошото работење на надлежните локални власти.
И покрај неколкуте зголемувања на цените на услугите кон граѓаните кои што менаџментот на претпријатието ги направи во изминатиот период, сепак состојбата во претпријатието е повеќе од влошена во однос на финансиите.
Ваквиот исход се гледа по фактот што до ден денес (26 Октомври) вработените во ЈКП “Брегалница” немаат земено плата за месец септември, на што реагираат во јавноста за да се слушне нивниот глас. Наши извори од вработени во претпријатието велат дека утринава состојбата била тензична врз основа на незадоволството поради неисплатенаите плати за вработените што ја проблематизира нивната егзистенција.
Овие наши извори кои што се повикуваат на законот за заштита на т.н. свиркачи јавно го прашуваат директорот на претпријатието да соопшти кога ќе ја исплати септемвриската плата за да можат овие луѓе да си ги прехранат семејствата и да си ги платат сметките, за што очекуваат одговор од директорот.
Сепак нашите информации велат дека и покрај доцнењето на платите, помеѓу вработените во претпријатието постои очигледна поделба на оние кои се во поголема група кои што јавно сакаат да го изразат својот револт преку демократски протест, додека постои помала група на послушници на актуелното раководство кои што се спротивставуваат на ваквите иницијативи и сметаат дека штрајкот за остварување на нивните законски права би бил контрапродуктивен.
Според извештаите кои што директорот и раковотството во претпријатието се должни да ги поднесат до делчевскиот совет, во изминатиот период забележливи се континуирани загуби на претпријатието уште пред почетокот на енергетската криза, така што самата енергетската криза не е доволно алиби за да се оправда ваквата лоша финансиска состојба на претпријатието.
