На вчерашната прес конференција на Силвана Ангелевска од Општинскиот Комитет на ВМРО-ДПМНЕ од Битола, настапот на Стево Пендаровски пред битолчани како дел од кампањата на Власта за промена на името и Уставот на Република Македонија го окарактеризира “како сеење на страв од типот на промена на границите и распарчување на Македонија”
Во продолжение ја пренесуваме прес конференцијата на Силвана Ангелевска во целост:
Во текот на вчерашниот ден во Битола беше испратен во неуспешна мисија од своите ментори Заев и Шеќеринска господинот Стево Пендаровски. Сите ние бевме сведоци дека се обиде со лажните тези за сеење на страв од типот на промена на границите и распарчување на Македонија да ги затскрие криминалните тендери вредни милиони евра и злоупотребата на народните пари од страна на власта.
Европските вредности не подразбираат сеење на страв, закани и уцени. Европските вредности не подразбираат делење на милионски суми на пари во четири очи без тендер и вработувања на најблиски роднини и пријатели во државните институции. Европските вредности не поздрабираат корупција, уништување на економијата, правосудниот систем, здравството, образованието, земјоделието.
ВМРО ДПМНЕ е првата партија во Република Македонија со програмска определба за влез во НАТО и ЕУ, но никогаш нема да прифатиме асиметричен и предавнички договор со нашиот јужен сосед кој е на апсолутна штета на Македонија, на нашиот идентитет, историја и култура. Јазикот, националноста, државјанството и идентитетот се стекнати права и чувства и не може да бидат предмет на уредување со билатерален договор.
Во тој срамен договор Република Македонијаза жал само се нарекува „втората странa”.
За влез во ЕУ и НАТО нам ни се потребни суштински реформи, а од реформа во повеќе од една година оваа влада ја нема ни буквата „р”.
Затоа, господа социјалдемократи, престанете со безмилосно трошење на народните пари и излезете од виртуелниот свет каде поразите сакате да ги претставите како победа. Народот ги препозна вашите лаги и манипулации и за многу кратко ќе го каже својот збор.
