Денеска, Недела (26.05.2019 година) со почеток во 12,00 со читање на духовна поезија во дворот на цркавата Успение на Пресвета Богородица во Делчево, започнува богата уметничка програма на која ќе настапат поети и сатиричари од Македонија, Бугаријa и Србија.
Станува збор за настан организиран на иницијатива на меѓународно-афирмираниот сатиричар и признат работник од областа на културата, (делчевчанец по потекло од Кичево), Миле Ѓорѓијоски во соработка со голем број автори, уметници како и Македонската Православна црква.
Веќе за во 14,00 во Градскиот парк, кај езерцата во Делчево, ќе се одржи промоција на заедничката книга на поезија на поетите од поетската група насловена како “Заеднички шепотења”.
Во оваа книга со избор на свои песни се застапени поети од Македонија, Бугарија, Србија, БИХ, Хрватска и Црна Гора, покрај нив со свои песни ќе се претстават и поети од Делчево.
Во рамки на настанот ќе се случи промоција на антологијата на афоризми „Трагачи по парадокси“.
Конечно овој племенит и монументален сатиричен алманах ќе ја доживее својата промоција во Делчево, после промоцијиите кои ги имаше насекаде на Балканот и пошироко во меѓународни рамки.
Како дел на оваа промоција со свои афоризми ќе се претстават неколку македонски сатиричари, а исто така афоризми од книгата ќе читаат и поетите од поетската група “Заеднички шепотења”.
Третиот дел од настанот ќе се одвива во просториите на Манастирскиот комплекс Света Богородица Балаклија Делчево, каде своја изложба ќе има академскиот сликар Сокол Маркоски.
Пред почетокот на самиот настан учесниците на настанот ќе бидат пречекани од старешината на црквата ереј Николчо Воиновски, и Архиерејскиот Намесник Протојереј Алаксандар Васев, со што на самиот настан му се дава една нова повисока духовна вредност.
Свештениот клер од Делчевското Архиерејско намесништво на Македонската Православна Црква како домаќини со овој настан почнуваат една нова преубава традиција со која овозможуваат литературната уметност да се вдоми кај преубавите цркви, раскошните дворови во заедништво со Бога и нашиот народ.
Оваа пракса планирано е да прерасне во традиционална и да се реализира секоја последна недела од месец мај на различни локации ниц Делчево и околината.
Во организацијата на настанот се вклучени повеќе граѓански организации од Македонија, Србија и Бугарија во соработка со Туристичка агенција, што дава едно ново светло за самата култура во овој дел од Република Македонија.
Во периодот кој што следува после оваа манифеставија до наредната година планирано е да се издаде и книга со духовна поезија во која со свои песни ќе бидат застапени поети од повеќе земји од Балканот како и роднокрајни автори од Делчево и поширокиот Брегалнички регион.Оваа промоција е прва од ваков вид која ќе биде направена во Делчево а ваквата пракса планирано е да продолжи да се реализира секоја наредна година што е своевиден кураж за Делчево но и авторите кои ќе бидат афирмирани преку ваквата публицистичка дејност.
Секоја наредна година во рамки на оваа манифестација, ќе се прави промоција на нова книга на членовите од оваа поетска група.
Посебен белег на самата манифестација ќе бидат младите кои се вклучени во организацијата и реализацијата на самиот настан.
