Како што ветив, еве дел од моите размислувања и предлози кои имаат една цел, да си ја зачуваме државата и општеството:
1. Веднаш да се смени одлуката со која им се одобрува на фирмите кои произведуваат заштитни маски, ракавици и слично, да можат да извезуваат 80% од тие продукти и да ги продаваат на странски пазари. Значи забрана за извоз на тие материјали се’ до момент додека Македонија има потреба. Нивното целокупно производство на маски и ракавици да биде откупено од државата и бесплатно да се подели на граѓаните,
2. Да им се помогне финансиски и со репроматеријали на ентузијастите – иноватори, кои сами произведуваат и донираат заштитна опрема за болниците,
3. Да се донесе Одлука за задолжително носење на маска на уста и нос за сите граѓани надвор од својот дом. Значи носење на маска секаде и во сите услови. За непочитување на мерката – казните да бидат ригорозни. За службени лица кои не носат маски казните да бидат најголеми.
4. Веднаш да се ревидира делумниот “полициски час” за сите лица, освен за повозрасната категорија на граѓани (со цел заштита на нивните животи и здравје). Значи кога повозрасните ќе бидат надвор, сите останати да бидат или на работа или дома. Во сите останати периоди, да има слободно движење на граѓаните со маски кои би им биле бесплатно поделени од државата. Да се дозволи пешачење, планинарење и индивидуален спорт. Како што нагласуваат лекарите, со седење дома имунитетот опаѓа, а нели 60% од нас треба да го пребродиме вирусот.
5. Да се блокираат населените места, односно сите влезови/излези да се контролираат. Значи да нема меѓуградска комуникација, освен за лица со дозвола и итни случаи. Да се групираат оние општини каде што нема случаи на Ковид-19 и блокадата да биде регионална. Таков е примерот со Виница, Македонска Каменица, Делчево, Берово и Пехчево.
5. Да останат на сила одлуките за училиштата, трговските центри, рестораните и сл.
6. Да остане на сила одлуката за забрана на групирање на едно место на повеќе од двајца, освен ако не се со иста адреса на живеење. За непочитување на мерката – казните да бидат ригорозни.
7. АРМ да добие видоизменета улога, односно да добие задача за помош на населението. Бидејќи станува збор за невоена мисија, пушките да се заменат со пумпи и други средства за дезинфекција и веднаш да се вклучи со поддршка односно помош на локално ниво (домови, згради, фабрики…). Исто така, да се фокусира на помош и достава продукти на повозрасните и ранливи категории на граѓани како и за поставување на болнички капацитети од карантински тип во касарн(а)и што ќе се одред(и)ат за таа намена. Поради новите ангажмани, АРМ да се повлече од обезбедувањата на Парламент, Влада, амбасади, затвори, гранична линија и други објекти.
Знам дека на сите ни е тешко, ама на овој свет не сме дојдени да уживаме, туку да се бориме и да победиме. Некои веруваат дека во таа победа ќе ни помогне природата. Некои дека ќе ни помогне Бог. Јас верувам во второто, иако тоа е едно исто.
