Претседателот на ВМРО-ДПМНЕ Христијан Мицкоски, за денешниот празник помеѓу народот позната и како “Голема Богородица” се наоѓа во посета на граѓаните на Берово. Во рамки на големиот број средби со жителите на ова Малешевско градче на истокот од Македонија, Мицкоски ги слушна изворно мислењата и проблемите на граѓаните со кои се соочуваат во своето секојдневие.
Денеска се наоѓаме во Берово, помеѓу граѓаните во Берово и Беровската општина. За жал од искуствата кои што ги добивам овде од граѓаните црна е сликата која што преовладува во Берово и Беровско. Се сретнавме со реални и сериозни егзистенцијални проблеми. ВМРО-ДПМНЕ ја подготвува програмата која што ќе биде презентирана пред граѓаните наскоро. ВМРО-ДПМНЕ во својата програма предвидува сериозни решенија на сериозни егзистенцијални и реални проблеми на граѓаните.
ВМРО-ДПМНЕ не ја базира програмата на гол наратив на популистички ветувања кои што се ветуваат и даваат пред изборните кампањи а потоа се бега како „ѓавол од темјан“ за нивна реализација, ВМРО-ДПМНЕ е политичка партија која што стои на зборот и она што ВМРО-ДПМНЕ ќе го стави и ќе биде дел од нејзината програма ќе го реализира. Промени се потребни во нашата држава, а Македонија ќе победи!
Воедно во духот на овој голем христијански празник упати честитки до сите павославни христијани кои го чествуваат денешниот духовен и верски празник.
На членовите на Синодот и на сите православни верници, од мое лично име и од име на ВМРО-ДПМНЕ, Ви го честитам големиот христијански празник Успение на Пресвета Богородица и ја изразувам мојата желба за многу среќа, радост и мир во душите на сите христијански верници.
Денешниот празник е сведоштво за мајчинската љубов, верата во Христа, и пожртвуваноста која е исполнета со добри дела и хуманост кон човештвото. Правејќи добри дела, создаваме и оставаме зад себе трајни вредности и секој еден на тој начин придонесува со свој личен пример за развојот на нашата земја и создавање на подобра иднина.
Верувањето во Христа, пожртвуваноста на мајката Богородица не учи дека добрите дела кон ближните, кон знајните и незнајните нема да останат незабележани, и тие се траен влог во изградбата на една личност.
Нашиот народ децении и векови наназад покажал искрена верба во Христа, споделување на заедничките христијански вредности, кои се општи, универзални и човечки.
Нека денешниот ден биде сведок и пример дека со искрена волја, чисто срце и верба можни се големи работи. Нам ни треба земја каде напредокот и среќата на нејзините граѓани ќе бидат во самите приоритети, земја каде ќе се работи на намалување на растечката сиромаштија, ќе се помага на гладните, а болните ќе ја добијат од системот на државата потребната грижа и услуга.
Денес нашата држава се соочува со бројни предизвици, а иселувањето на младите е еден од нив. Нивното раселување значи изгубена и уништена иднина, затворени куќи, напуштени родни огништа. Треба сите заедно да придонесеме да создадеме подобра иднина, подобри услови за живот и само така ќе бидеме од полза на нашата земја и општество. На нашата земја и е потребна и сплотеност и обединетост, за да се постигне ова, треба да се стави крај на политичката одмазда и политички прогонуваните случаи. Македонија мора да започне да оди напред и да ги користи сите свои потенцијали, затоа што само така Македонија ќе победи!
Нека ни е честит и вековит големиот христијански празник Успение на Пресвета Богородица!
