Интегрален текст на прес конференцијата на Иван Јорданов- Кандидат за пратеник од редовите на ВМРО-ДПМНЕ и Коалицијата за Обнова на Македонија од Штип во третата изборна единица.
“Почитувани сограѓани,
Со проектот Обнова, ВМРО-ДПМНЕ предвидува мерки, со кои ставаме акцент на Вашето потрошено време. Имено, за да ги намалиме редиците пред шалтери, да го заштедиме времето на чекање за издавање документи и да ја зголемиме ефикасноста на администрацијата, ќе креираме неколку системи преку кои ќе се олесни издавањето на документи.
Се обврзуваме за поврзување на институциите во еден заеднички систем, кој ќе биде едношалтерски систем за граѓаните и бизнис-заедницата. Тоа значи електронско поврзување на сите јавни институции на локално и централно ниво во еден шалтер, со цел издавање на документи од истиот и дистрибуција до странките во предвидените законски рокови.
Ќе се воведе унифициран електронски систем за управување и следење на документи од страна на граѓаните и секој граѓанин ќе има увид кој документ, до која фаза и кај кој вработен се наоѓа.
За 50% ќе се намалат надоместоците за издавање на службени документи од институциите.
Ќе извршиме целосна дигитализација на рецепти, упати, извештаи и резултати.
Со овој систем рецептот од лекарот ќе може да се подигне во која било аптека со документ за лична идентификација од страна на пациентот или негов близок.
Почитувани,
Ние се грижиме за вашето време и вашите пари.
Оваа Обнова ќе го олесни животот на секој граѓанин во државата.
Затоа, изберете паметно и гласајте за ВМРО-ДПМНЕ!”
