До нашата редакција пристигна партиска реакција од Иван Јорданов кој што е Претседател на Општинскиот комитет на ВМРО-ДПМНЕ во Штип во врска со неостварените ветувањa на Градоначалникот на Општина Штип Благој Бочварски.
Истата ја пренесуваме во целост:
“Почитуван Бочварски,
Ако мислите дека меморијата на граѓаните на Општина Штип е слаба и не се сеќаваат на вашите изјави, морам да Ви кажам дека се лажете.
Не само што добро се сеќаваме на секоја Ваша лажна изјава, туку веќе почнавме да веруваме дека Вашите способности се доста ограничени. Тргнувајќи од состојбата со коритото на река Отиња, кое веќе втора година како стои незавршено за само 200 метри, никако не можам да стигнам до визијата дека ќе имаме брана на истата таа река.
За да го потврдам моето тврдење, на Вас и на јавноста ќе ги дадам на увид следниве факти:
•Во месец јули 2019 година, заедно со премиерот ветивте 7,5 милиони евра за изградба на брана на р. Отиња при што првите средства ќе бидат обезбедени со ребалансот на буџетот, а во септември ќе започне тендерската постапка – не се случи!
•Во месец октомври 2019 година, пред медиумите, со куп документи пред Вас, ги информиравте граѓаните дека сте подготвени за изградба на браната, ги чекате првите пари да стигнат до крајот на годината. Не само што не се случи, туку деновиве дополнително се заплеткувате во мрежата од манипулации.
•Во текот на вчерашниот ден повторно ја замајувавте јавноста со истата таа брана. Имено, сега веќе ги нема ветените 7,5 милиони евра, туку пред јавноста мавтате со половина од тие средства и тоа предвидени во буџетот за 2020 година!
Почитуван Бочварски,
Престанете да ја манипулирате јавноста!
Граѓаните веќе знаат дека ова не е правиот, туку лажниот пат!”
