Д-р Велика Серафимовска Стојкова од Факултетот за музички уметности, врз основа на изјава за тоа дека поетот Кочо Рацин наводно бил под заштита на УНЕСКО, упатена во научен академски говор од страна на Људмил Спасов, реагираше во јавноста со свои информации по однос на ова прашање.
Нејзината реакција упатена на социјалните мрежи ја пренесуваме во целост:
По повод изјавата на Љ. Спасов и насловот „Рацин е поет под заштита на УНЕСКО“, да ги појасниме работите…
Во УНЕСКО постојат програми и конвенции кои се однесуваат на повеќе области каде се заштитуваат добра од природно, нематеријално, материјално, културно, подводно и други видови наследство на човештвото и природата. Меѓу овие конвенции и програми од 1993 год. постоеше програмата Living Human Treasures која заради самаат природа на living (живи) во 2003 год. премина во Конвенцијата за нематеријално културно наследство.
Од 1992 год. постои програма наречена Memory of the World во која се впишуваат и збирки, архиви, библиотеки, како и оставината (документи, материјали и слично) на великани од областа на науката, литературата и уметноста (како на пример на Ј.С. Бах). Ваквите програми и конвенции на УНЕСКО имаат регистри и листи на ЗАШТИТЕНИ добра за кои се предвидени посебни мерки и критериуми.
Македонија има вкупно 7 впишани добра во регистри на три конвенции и градот Битола кој е дел од UNESCO Creative Cities Network. Истовремено УНЕСКО постојано поддржува изданија, промоции, концерти, настани и проекти преку кои ја промовира светската уметност, литература, култура и природно наследство. Такви проекти се и едициите на светска литература и светска музика кои претставуваат збирки на дела од автори од целиот свет издадени од страна на УНЕСКО.
Но, тоа не се Заштитени добра!
Значи, Коста Рацин, за жал, НЕ Е под заштита на УНЕСКО!!!!
Аман луѓе, внимавајте какви изјави давате, особено во академски говори и медиумски изјави! Ви се руши кредибилитетот, а само треба да проверите на страната на УНЕСКО. Па греота е во денешно време вакви работи да читаме…
