Во организација на т.н. Зелен фронт кој е составен од голем број на организации (формални и неформални) кои што се активни во граѓанскиот сектор, во петок на 20-ти Декември во Скопје ќе се одржи т.н. Марш за нашите животи.
Обединети под слоганот “СТОП за 3500 жртви од загадениот воздух!” граѓаните уште еднаш ќе ги реафирмираат барањата од минатиот масовен протест во Скопје кога исто така голем број на активисти излегоа на протест во врска со проблемите со животната средина.
Во продолжение ја пренесуваме целата порака упатена на социјалните мрежи во врска со овој најавен протестен марш во Скопје:
“Во исчекувања на првиот рок за исполнување од нашите над 100 барања – 31.12.2019, #ЗеленФронт на здружени над 35 граѓански движења, иницијативи, организира втор протестен марш, во петок, 20-ти декември. Времето и маршутата остануваат исти од претходниот марш.
17:00 пред Министерството за животна средина, крајна цел: пред Влада. Остануваме на улиците за да ги потсетиме на нашите барања, затоа што ова е прашање на живот или смрт, кое не смее да чека повеќе ниту момент!
Се бориме за живот од ден за ден. Умираме во илајдници годишно од загаден воздух. Мутираме, пренесуваме на поколенијата болести поради сеопфатната загаденост во која живееме, во која се раѓаат нашите деца. Белите дробови ни се зацрнети, иако не сме сите пушачи. Живееме во време на еколошка катастрофа.
Се бориме за својот живот низ цела држава, против каменоломите над нашите глави чија прашина нè гуши, постојаните експлозии ни ги ронат домовите, против рудниците чии вековни отрови ќе останат да стојат над нашите земјоделски полиња, домови, против малите хидроцентрали кои ни ги земаат нашите реки кои пресушуваат за нас, против уништувањето на единственото светско природно и културно наследство кое го имаме, едно од 39те во цел свет, против изумирање на езерата, против уништување на шумите, против депониите на секој чекор, против отровните чадови кои постојано се шират од нив, против канцерогениот дим од запалените кабли и гуми, против игнорирањето на Ромите кои живеат во пост-апокалиптични услови во нашето непосредно соседство, против зградите кои никнуваат околу нас и ни го одземаат хуманиот живот, … се бориме секој ден со сите еколошки катастрофи кои ни се случуваат во земјава.
Ние се бориме за живот, а имаме само декларации за заложби. Бараме да се исполнат основните предуслови за да се покаже дека навистина нашите животи значат, дека илјадници прерано починати и заболени се причина нашите животи да станат приоритет на оваа држава.
Нашите над 100 барања се тие предуслови со кои власта ќе покаже дека навистина СМЕ приоритет, НИЕ, НАШИОТ ЖИВОТ и ЗДРАВЈЕ.
Ова е Марш за нашите животи низ цела земја, Скопје, Битола, Тетово, Велес, Гостивар, Струмица, Ново Село, Иловица, Штука, Струга, Охрид, Возарци, Кавадарци, Чифлик, Демир Капија, Жировница, Лабуништа, Шлегово, Пробиштип….
Нема компромис со барањето за чист воздух!
Нема изговори за непреземањето на мерки!
Нема пауза во борбата за здрава животна средина!
Ова е Марш за ЖИВОТ! “
-стои во објавата на социјалните мрежи во врска со овој настан.
Организатори на протестот се следните организации:
Fridays For Future Skopje, O2 Иницијатива, Не Биди Ѓубре, Скопје Смог Аларм, Билка, Мој Воздух, Битола сака чист воздух, Спас за Водно, Eco Guerilla, Здрава Котлина, Еко Долина, Охрид SOS, жители на Жировница, Скопје бара чист воздух, Е.Д.Е.Н., Грин Пауер, Levizja Nena dhe Femija/ Движење Мајкa и Дете, Младите на Штука-Иловица против рудникот, Ние сме Карпош 4, ЕкоКарпош 3,2,1, Движење за чист воздух, Стоп на загадувањето, Плоштад Слобода, Го Сакам Водно, Поинаку, Група граѓани од Визбегово, Автокоманда сака да дише, Шепасти ентузијасти, Дејзи Фемили, Здравје пред профит во Центар, Shoqata ekologjike GvEko / Еколошко здружение ГвЕко / Ekoloji dernegi GvEko, AVAJA, Екоскоп, ЕД Тисовец, Struganët për Strugën/ Стружани за Струга, Еко Чифлик, Анима Мунди, Young Friends of the Earth Macedonia
#ЗеленФронт #ЗеленаРеволуција #МаршЗаЖивот #ЕкоРемет
