Енормните покачувања на цената на енергенсите, пресликани преку зголемување на оперативните трошоци од почетокот на годината како и недомаќинското работење со енормни загуби во минатите години од страна на претходното раководство во ЈП “Исар” Штип, денеска резултираше со минимално зголемување во апсолутен износ на цената на услугата за прибирање, транспорт и депонирање на комунален смет во општина Штип.
Недомаќинското работење од претходното раководство во ЈП “Исар” само во последните 2 години според тековни информации, нанижало над 25 милиони денари загуба за претпријатието. Поради ваквата затекната состојба на неповолно финансиско работење во минатото, но и поради поскапувањата на нафтата која што е основен енергенс за прибирање, транспорт и депонирање на сметот, врз основа на формула која ги дефинира влезните и излезни параметри за оптимално функционирање на претпријатието, поскапувањето на т.н. ѓубрарина од 1,1 денар по м2 површина на 2,4 денари за домаќинства и поскапување од 0,14 на 0,20 денари по м2 дворна површина, ќе значи минимално поскапување на износот на целата сметка за да не се доведе во проблематична ситуација работењето на ЈП “Исар” Штип кое што обезбедува широка лепеза на услуги за граѓаните на Штип.
Евентуалните проблеми и крах во работењето на ЈП “Исар” Штип би значело проблеми со целата оператива со што ќе се доведат под знак прашање основните животни потреби за граѓаните. Од тие причини е неопходно ова минимално зголемување на цената на споменатата услуга.
Во последните недели вработените на ЈП “Исар” Штип посветено работеа на обезбедување на вода за пиење за жителите на Штип, во контекст на дотраената водоводна мрежа која во повеќе наврати појавуваше дефекти на критични точки, кои експресно беа санирани од страна на екипите на ЈП “Исар”.
