Еден од гигантите на кожарската индустрија не само во брегалничкиот регион туку и пошироко – штипска Баргала е соочена со масовен број на тужби од страна на работниците најмногу поради неисплатени плати и придонеси. Загрозените основни работнички права од страна на оваа компанија добиле своја манифестација во вид на огромен број на тужби кои што биле поднесени до судските органи во Штип. За проблемот да биде поголем надлежните судски органи овие тужби ги чуваат во фиоки и не постапуваат по истите што го подига вниманието на јавноста кон овој проблем на едно повисоко ниво.
Од страна на Општинскиот комитет на ВМРО-ДПМНЕ од Штип на ваквиот проблем му даваат политички контекст а вината за непостапувањето на надлежниот суд ја лоцираат во непотистичките роднинско-политички врски на поединци во врвот на СДСМ од Штип.
Во продолжение го пренесуваме партиското соопштение упатено до јавноста од страна на ВМРО-ДПМНЕ ОК Штип:
“Бројните реакции на работниците во Баргала и други локални фирми, не го активираат алармот на власта за покренување на санкции за прекршувањето на правата на работниците. Иако владеачката СДСМ се правда и навидум „ги штити“ правата на работниците, сепак, праксата и реалноста покажуваат друго.
Имено, Здружението Гласен Текстилец неколку пати посочува дека постојат дури 200 тужби на работници за нарушување на нивните права, во делот на исплатени плати и придонеси. Меѓутоа, овие предмети не се процесуирани, па недвосмислено се поставува прашањето дали за тоа е одговорен претседателот на судот, кој е прв братучед на претседателот на СДСм во Штип-Александар Кангалов? Дали раководството на СДСМ проблемот на работниците во Баргала гледа да го скрие „под тепих“, единствено затоа што е фамилијарна компанија на пратеникот од СДСМ – Сашко Николов?
Ова се само дел од прашањата кои имаме да ги поставиме на оваа власт, но и на локалното раководство на оваа тиранска и тоталитарна партија,”
-соопштуваат од ВМРО-ДПМНЕ ОК Штип.


