Нашата Животинска фарма?
Стерилизирани кучиња и бесни мачиња ја поведоа колоната наместо вучјакот на Маршалот. Дебели свинчиња и останати живинки го влечеа Артур за јазик да каже нешто погрешно. Нешто тамам за во затвор. И затоа кутриот лик си замина од една на друга територија. Чунки таму други анималии.
Субверзивни дејанија и деморализирано опшеСво и паразити на секое ќоше, ваши, наши, нивни…
Секој може да чита.
Секој пишува на рака.
Денес живееме во приватни часови на еден Голем учител кој располага со бројки, факти, пари и со камшик. Да, да со голема прачка во вид на бич во десницата и со курвинско-нежен глас, кој повеќе повикува на оргии отколку на строг прекуморски чичко.
Го накрши јазикот како опната струна од виолина и посака да биде чуен и разбран, го спушти мирно очилата како селски даскал и ја набразди ќелавата му глава.
Како сте п….и?
Како сте пионери?-запраша повторно.
Тешко стасуваат писмата од Народот во оваа пуста пустелија. Поштарот продолжи да ги правда своите дејанија со обесена електронска торба на појасот.
Прашуваше за државата Македонија. Каде е? Како се оди дотаму?
Сета руска салата ја изедоа децата, можам да ви понудам само американски копани и бугарска ракија!- се понуди Домаќинот и го затвори голиот Месинџер.Чепкајки по длабокиот и темен Нет му се пристори повеќе Бруто отколку Нето за да се јавува на министерот за економија во здравството.Теглите сите се расфрлани по рафтот, ама празни. Немавме можност годинава!?
Беше визијата за модерна Европа, беше оскудација, не заштедиме доволно.
Така не известија на Радио Фарма. Наполеон ретерираше, тој е главната свиња. Три чекори напред а четири назад, само да не стоиме во место.
Да се помочам во правната Фарма, се понуди Поштарот, кога се немало закон за нас, уметниците.
Преживеаните, преживарите, пардон преживувачите на чашка ракивче, на бело, и на сирење.
Па живеете во средена Рубикова црно-бела коцка а не во врела ноќ на бела месечина.Вие сте Следбеници на Новиот поредок.Вие сте новата песна, новата правосмукалка на црпнатото време.Вие сте нашите модерни академици на академијата на мјауу и мууу…вие сте уметничките дострели на една винска дестилација, ве познавам по малите мушички кои се лепат.
Вие сте легенди!
Вие сте судбината на новото време, ослободени од облигации и морални вредности, оперирани од туморот наречен патриотизам, ослободени од астмата на националното чувство кое закашлува како туберкулоза бабичка, како гној во грлото на оперски пејач.
А бре, вие сте ав, ав и бере на Новото време.
Секоја среда на пладне, ќе ви дојде газдата и пред него да си бидете среќни.(чунки среќен ден)
Духовните потреби и аномалии не се во наша надлежност, тоа не е политичка дисциплина и секој си останува со своите брчки и гафови , со своите кражби, гревови и лапсуси.
Новиот режим не се воведува да го укинеме стариот. Новиот си е нов!
А вие, сте предодредени на бело, и на црно-бело (без Шаренило) да бидете новите пајтонџии. (не дај боже таксисти)
Нам не ни треба правна фарма!
Нам ни треба една организирана кланица и животни во срцата за да ги средат убаво своите браќа по крв и сало. Да ги наполнат со вино и друг алкохол и да ги подарат на своите родители потпечени и крцкави.
Само така старите феудалци ќе разберат за болката на селанецот-свиња, земјоделецот-коза, работникот-вол и другите ценети животни од нашата фарма.А Големиот брат ќе ги вклучи сите мегафони, владини и невладини:
-Чујте и почујте!
Задолжително да ја дезинформирате и искористите јавноста.Вие сте нашето бее и нашето муу во етерот.
Другари и браќа, ова не е повеќе нашата Животинска Фарма!
Оваа е нечија ничија друга територија. Ве бакнува Раскажувачот во вашите зачитани очи.
Четири нозе-добро, две нозе-лошо?!
Чунки бетер ќе биде ако прогледате?!
Пишува:
Гоце Марков
-колумнист, Македонец и човек
