Катастрофалното менаџирање со пандемијата со Ковит 19 од страна на власта во државата како и префрлањето на одговорност врз самите граѓани за непочитување на мерките, го зема својот данок. Додека властите отвараат градинки и училишта во објекти и услови кои што се далеку од соодветни за ваков вид на зараза, додека кафе-барови и дискотеки несанкционирани се полнеа со луѓе “живеејки ја новата нормалност”, Македонските граѓани живеат во ужас кој што по се изгледа нема крај.
Алармантните бројки на новозаразени лица како и зголемениот индекс на смртност од Ковит-19 во последните неколку денови очигледно не допира до надлежните кои што упорно наложуваат владини мерки кои што не одговараат на реалната состојба на терен.
За ваквата поразителна состојба придонесуваат и про-владините медиуми кои што се изземаат од критика на актуелната власт во врска со политиките кои што ги спроведуваат на штета на граѓаните. Големиот број на починати лица е доволен аларм за надлежните но и целата јавност, кој што никако да се запали на соодветно ниво.
Без разлика дали станува збор за возрасни или млади лица, за хронично болни или релативно здрави лица, секој загубен Македонски живот треба да биде аларм на највисоко ниво кај власта. Наспроти тоа во изминатите месеци погодени од пандемијата гледаме бледа слика на власт со огромна доза на профитерство на маката на граѓаните.
Вкупната бројка на ковид дијагностицирани во нашата земја од почетокот на епидемијата изнесува 16417, бројката на оздравени пациенти е 13732, на починати е 683, а во моментов бројот на активни случаи во земјата изнесува 2002.
Министерството за здравство информира дека во последните 24 часа се направени 1545 тестирања, а регистрирани се 144 нови случаи на ковид-19 во: Скопје-27, Куманово-11, Дебар-3, Штип-5, Прилеп-13, Тетово-13, Велес-4, Битола-5, Охрид-2, Кавадарци-1, Гостивар-8, Гевгелија-2, Струмица-15, Крива Паланка-1, Радовиш-8, Крушево-2, Кочани-13, Македонски Брод-1, Берово-2, Виница-1, Делчево-3, Кичево-2, Ресен-2.
Починати се 8 лица, еден пациент од Куманово (48г), еден од Штип (65г), двајца пациенти од Прилеп (62 и 83г), еден од Тетово (69г), еден од Струмица (39г), еден од Виница (63г) и еден пациент од Кичево (56г).
