Градоначалникот на општина Македонска Каменица Димче Атанасовски повторно покажува вистински пример за тоа како се приоретизира трошењето на парите од општинската каса.
Наместо набавка на мобилни телефони за општинската администрација, значаен фонд на финансии од страна на градоначалникот ќе бидат пренасочени кон директна помош на граѓаните и семејствата во Македонска Каменица.
Ќе следува набавка на ТВ уреди потребни за наставата и воспитниот процес во Детската Градинка “Бамби” како и обезбедување на таблет компјутери за ученици од социјално ранливи категории на граѓани.
Паралелно со овие набавки од страна на градоначалникот Атанасовски ќе биде обезбедено 3000 денари како финансиска парична помош за првачињата и 20000 денари за средношколците запишани во прва година во локалната гимназија.
За неколку денови се очекува да биде објавен и повикот за доделување на стипендии за ученици и за студенти од Македонска Каменица, што ја прави оваа општина една од лидерите во регионот и пошироко кои што овозможуваат ваков обем на мерки за своите граѓани.
Притоа градоначалникот неодамна најави дека непречено ќе се реализираат сите зацртани инфраструктурни проекти кои што исто така зафаќаат завидно ниво на финансии од општинскиот буџет.
“УШТЕ ЕДНА ОДЛУКА ВО КОРИСТ НА ГРАЃАНИТЕ
Имајќи во предвид дека сме соочени со незапамтена енергетска и економска криза, донесовме уште една одлука во корист на граѓаните.
Согласно Договорот за мобилни телекомуникациски услуги, Општина Македонска Каменица има можност за набавка на уреди, кои во сите изминати години до сега биле во вид на мобилни телефони распределувани на вработените од општинската администрација.
Оваа година ќе набавиме три телевизори за Детската градинка “Бамби” и таблети за ученици од социјално ранливи семејства.
Во наредните две недели ќе биде објавен Повик за распределба на еднократна парична помош за првачиња во износ од 3.000 денари и за средношколци запишани во прва година во СОУ “Миле Јаневски Џингар” во износ од 20.000 денари.
Од 15.10.2022 година ќе биде објавен и Конкурсот за стипендирање на ученици и студенти.
Продолжуваме посветено и сите општински ресурси ги ставаме во корист на каменичани.”
-соопшти за јавноста Градоначалникот на општина Македонска Каменица Димче Атанасовски.
