Кандидатот за градоначалник на СДСМ за Општина Штип, Благој Бочварски најави дека во неговата Програма предвидена е мерка за решавање на станбеното прашање на младите брачни двојки.
– Секој млад брачен пар кој ќе сака да изгради свој сопствен дом, свое живеалиште, куќа до 150 метри квадратни, ќе биде субвенциониран со комуналиите за 50 проценти. Тоа значи дека секој оној кој што ќе реши да изгради сопствен дом, комуналии кон Општина Штип ќе плати само за 75 метри квадратни. Оваа мерка е едно огромно олеснување за младите брачни парови во Штип, вели Бочварски.
Тој забележа дека со оваа мерка, но и со останатите кои се дел од програмата целта е да се задржат младите во Штип.
Бочварски на денешната прес-конференција ги повика граѓаните на Општина Штип да присуствуваат на вечерашниот митинг на СДСМ, кој почнува од 20 часот на Градскиот плоштад „Слобода“, а на кој, како што рече, ќе се упати пораката до локална власт во заминување дека на 29 ти Октомври доаѓа нов живот и нова локална власт.
Кандидатот за градоначалник на ВМРО-ДПМНЕ за Општина Штип, Илчо Захариев на денешната прес-конференција истакна дека битката во кампањата за вториот круг на Локалните избори ја бие со, како што рече, целата Влада на Зоран Заев и со дел од припадници на СВР-Штип, а не со неговиот послаб противкандидат.
– Во овој миг битката ја бијам против целата Влада на господинот Зоран Заев. Значи цело време се присутни овде во Штип и тоа покажува дека колку е значаен Штип, но ми дадоа и некое значење. Јас мислев дека сум мал градоначалник, дека сум безначајна фигура. Сега гледам колку сум бил важен за овој град и колку е важно Штип да добие прав градоначалник, рече Захариев.
Тој тврди дека на граѓани им се делени прехранбени производи и чевли, а вработени во јавната администрација кои се под ингеренции на централната власт и членови на Избирачки одбори трпат притисоци и уцени од страна на СДСМ, за што јасно говори, како што рече, во недела имаат намера да вршат лажирање на изборите. Захариев забележа дека сепак граѓаните знаат да препознаат вистинска програма, а во изминатите четири години се реализирани 450 проекти.
– Отиња не можете да ја заборавите, патеката за шетање покрај коритото на река Брегалница, Мултимедијалниот центар, Зоолошката градина, 160 асфалтирани улици, комплетна инфраструктура во селата. Тоа го направивме ние, вели Захариев.
Тој додаде дека граѓаните на Штип на 29 октомври ќе гласаат за вистински и реални проекти, а вечерта на Градскиот плоштад заеднички ќе ја прослават победата
