Во услови кога државата веќе неколку години е окупирана од инсталирани власти кои во континуитет работат за уништување на идентитетот на Македонскиот народ, единствено моќно оружје кое им преоставува на граѓаните е громогласноста на масовноста!
Одлучувајки на тајни и нетранспарентни средби и состаноци на кој начин да го спроведат уништувањето на нашиот идентитет неколкумина поединци во власта ги користат сите инструменти на моќ и присила кои што им стојат на располагање за исполнување на нивната цел. СДСМ и ДУИ заедно со нивните сателит-партии во парламентот и на клучни позиции во власта се неприкосновени во она што значи менување на име, бришење на историја, откажување од делови на Македонскиот народ во соседните земји, а сега се во налет во целост да го избришат Македонскиот идентитет препишувајки му го на Бугарите.
И не треба да се сомневаме дека оваа власт до крај ќе ја игра улогата која им е доделена на нивните странски стопани кои за шака пари ги имаат купено и ставено во скут нашите домашни ненанродни владетели.
Големите народни протести во изминатите недели видовме дека не се соодветен начин на борба против оваа ненародна влада која не се колеба да употреби насилство, репресии, затварања и прогон на поединци преку кои упатува порака на страв кај целокупното население. Покрај сликите и видеа за масовноста на протестите на граѓани кои се против бугаризацијата содржана во т.н. Француски предлог, бевме сведоци на монструозноста на власта која провоцира насилство а потоа апси невини млади луѓе кои ги суди затоа што се револтирани од нејзините одлуки за бугаризација на секој еден Македонец. Протестот како демократско право е контаминиран поради таа можност на власта да ги претвори во насилни и да го сврти ефектот од протестите во негативен контекст спроведен по веќе познатото сценарио. Лечењето фрустрации и предизвикување на дополнителни фрустрации на социјалните мрежи исто така не е начин за да се победи ова зло надвиснато над Македонија кое на сопствен платен список има далеку помоќни и поорганизирани свои мегафони кои што се професионалци во тоа што го работат.
Протестите беа добар вовед во она што ќе следува, проследено со добар и продуктивен медиски активизам до постигање на нашата цел.
Денеска во окупирана Македонија управувана од актуелната ненародна власт единствен но истовремено најмоќен политички инструмент е гласот на мнозинството. Не на улица, не на протести, не на социјални мрежи….
Тоа е гласот на претстојниот најавен референдум со кој што Македонскиот народ ќе може да одлучи дали води потекло од Бугарите или е со свој сопствен историски идентитет и континуитет од најдамнешни времиња.
Гласот на референдум за безвременскиот континуитет на Македонскиот идентитет ќе стане силен историски факт пред кој што ниедна светска сила нема да биде имуна на неговото значење.
Ние постоиме и имаме став за сопствениот идентитет и тоа најдобро може да го покажеме преку моќта која ја дава референдумското изјаснување на секој поединец кој што е значаен дел од големиот квантум на Македонски идентитет ширум светот.
Сите Македонци по род и убедување кои што не се гледаат себеси како производ на бугарската доктринарна матрица на империјалистички аспирации, треба, всушност мора да се вложат себеси во успешноста на претстојниот референдум кога по 1991 година повторно ќе му кажеме на светот дека постоиме. Но што е уште поважно ќе го свртиме текот на историјата во интерес наопстој и афирмација на Македонскиот идентитет кој што е сериозно разнишан од ударите кои ги нанесоа политичарите во врвот на актуелната влада која 5 години делува против волјата и интересите на народот и граѓаните.
Референдум за Македонија, Референдум за Македонскиот идентитет и постоење, Референдум за сите Македонци во целиот свет, Референдум за да победиме!
Пишува: Кирчо Анастасов
