По последните врнежи од дожд во Виница попушти новата регулација со која што требаше да биде уредено речното корито на Градечка Река во оваа општина. Делови од изграденото корито на реката се поткопани, испукани и изместени од својата проектирана местоположба , што претставува индикатор за нестручна и неквалитетна изградба на самата регулација. Дополнително ваквите пореметувања на геометријата на коритото, може во блиска иднина да прогресираат до целосно уништување на новоизградената регулација под налет на поголем поплавен бран на самата река, која знае да надојде при поголеми врнежи на дожд.
Реализацијата на изградбата на регулација на Градечка река беше проект кој што беше најавен во предизборната програма на актуелниот градоначалник на Општина Виница Ивица Димитров, со рок на реализација до 2019 година.
Од Општинскиот комитет на ВМРО-ДПМНЕ од Виница, во јавноста упатија своја реакција во врска со овој проблем, барајки одговорност од надлежните лица кои за нестручно и неквалитетно потрошените пари на граѓаните на Виница.
“И кога бевме подготвени да честитаме за конечно реализација на ЕДЕН ЕДИНСТВЕН капитален проект од изборната програма “Живот во Виница”, првиот поголем дожд не предомисли!
Во изборната програма ветуван со рок на реализација 2019 година, потоа во август оваа година од градоначалникот најавуван дека ќе заврши до крајот на 2020 година, а чијашто реализација е на половина, буквално се РАСПАЃА при првиот пороен дожд!
Проект кој што првично беше најавено дека ќе чини 15, за да на крај достигне цена од речиси 18 милиони денари, не го издржа првиот дожд!
И конечно, бараме одговорност! Иако не е ни на повидок конечна реализација, бараме одговорност и одговори како Градечка река при првиот дожд однесе 18.000.000 денари!
#ГрадечкаРека”
-стои во реакцијата упатена до јавноста на ОК на ВМРО-ДПМНЕ од Виница.
