Не стивнуваат бранувањата во јавност кои што ги предизвика првото телевизиско интервју на Драган Ковачки кое што се емитуваше на програмата на Телевизија АЛФА во рамки на вечерната емисија “Заспиј ако можеш” од пред некој ден.
По серијата на изнесени и аргументи на адреса на Министерството за негово подобро функционирање и стандардот на војниците воопшто за кој што говореше Драган Ковачки, од Секторот за комуникација со јавноста на министерството во јавноста се обратија со свое соопштение. во него ПР службата на Министерството не навлегувајки во објаснување на аргументите кои ги изнесе во јавноста Ковачки, изврши класичен напад на личноста на Полковникот Ковачки што е под секакво ниво на комуникација на ваква сериозна институција какво што треба да биде ова министерство.
Од ВМРО-ДПМНЕ повратно упатија дополнително соопштение во врска со ова соопштение чиј што текст го пренесуваме во продолжение:
“Министерката за одбрана Радмила Шеќеринска упорно се крие и избегнува одговорност за своите постапки пред Македонската јавност. Во недостиг на аргументи и одговори на упатените прашања и сомневања од страна на Драган Ковачки во јавноста, таа уплашено се обидува да се скрие зад т.н. соопштение на Секторот за комуникации, аналитика и оперативна поддршка на Министерството за одбрана.
И се ќе беше во ред доколку не ги познававме вистинските професионалци кои работат во овој сектор кои во моментот се заменети со партиски мегафони во министерството задолжени да го бранат ликот и делото на Радмила Шеќеринска.
Од Министерство зад кое што треба да се обединат сите граѓани, Шеќеринска успеа да направи партиски пропаганден центар на СДСМ кој што треба да ја шири розевата слика на Зоран Заев, Радмила Шеќеринска и останатите функционери на СДСМ во власта.
А сето тоа наспроти суровата вистина на уназаден безбедносен систем кој што секојдневно се деградира со актуелните постапки на Шеќеринска во министерството. Прашањата кои ги тиштат припадниците на АРМ вешто се избегнуваат по секоја цена од нејзина страна. Наспроти тоа се лиферуваат дрски соопштенија од името на Министерството за одбрана кои имаат за цел дискредитација на лична основа без вистинско суштинско објаснување на проблемите. Ваквите т.н. реакции со кои се прави обид да се наруши угледот на еден припадник на АРМ на висока армиска позиција на лична основа дополнително го нарушуваат угледот на Министерството за обрана.
Ваквата пракса на газење по личноста на висок армиски офицер во Македонската армија многу бргу ќе биде минато со заминувањето на Шеќеринска од Министерството за одбрана после парламентарните избори во Македонија.”
-стои во соопштението упатено до јавноста од опозициската ВМРО-ДПМНЕ.
