30 дневен притвор за 4ца од осомничените за нападот врз Зијадин Села во Собранието на 27 април. По предлог на Јавен обвинител, судија на претходна постапка им определи мерка притвор на лицата кои се под истрага за сторено кривично дело Убиство во обид сторено во соизвршителство.
Петтото лице за кое обвинителство исто така предложи мерка притвор, поради влошената здравствена состојба, судот дополнително ќе одлучи.
Претходно уште во мај беа притворени две лица кои се сомничат за Убиство во обид врз лидерот на Алијанса за Албанците. Обвинителство вчера објави фотографии од три лица осомничени за настаните во Собранието на 27 април за кои побара помош од граѓаните доколку ги препознаат да пријават во полиција.
По неколку часа лицата беа идентификувани и приведени. Од јавното обвинителство соопштија дека станува за лица кои се инволвирани во кривично правниот настан во Собранието на Република Македонија.
Во меѓувреме Од ВМРО ДПМНЕ соопштија дека Извршниот комитет на последната седница донел одлука за покренување иницијатива за итно и неодложно ослободување и амнестирање на сите лица кои извршиле одредени законски прекршувања во инцидентите пред и во парламентот на 27 април. Оттаму велат, оваа одлука доаѓа по констатацијата дека во изминативе 5 месеци очигледна била политиката на власта за масовно ослободување на 1050 криминалци.
„ Гледајќи од денешна гледна точка, кога пред очите на целата јавност со политичка одлука и интервенција се ослободуваат огромен број сторители на тешки кривични дела, меѓу кои и свирепи убиства на етничка база, што говори дека е ова масовен тренд, добро испланиран, а не случајност, ВМРО-ДПМНЕ смета дека е неправедно било какво натамошно гонење на лицата учесници во немирите на 27ми април. Ние сочувствуваме и жестоко ги осудивме повредувањата на пратениците на 27-ми април, но не сметаме дека нивните рани повеќе болат од раните на оние лица чии сторители наскоро ќе бидат ослободени со законот за амнестија веднаш по изборите. Уште помалку цениме дека делата за кои се теретат овие лица се поважни од животите на убиените млади лица кај Смилковското езеро, и редица други повреди сторени од лица кои веќе се наоѓаат на слобода или наскоро ќе се најдат на слобода со политички договор помеѓу коалиционите партнери на власта или со политичка одлука или интервенција на СДС.“ – е ставот на ИК на ВМРО ДПМНЕ.
Пратеничката група на ВМРО-ДПМНЕ ќе поднесе амандман на законот за амнестија или ќе предложи посебен закон за прекин на постапката и ослободување на лицата учесници во настаните од 27 април .
Со тоа од партијата велат, тие не го менуваат својот став во правец дека физичкиот напад врз пратениците било голема грешка на дел од демонстрантите, ниту пак се повлекуваат од неговата осуда, но сметаат дека е правично да се ослободат и овие лица.
Според ВМРО ДПМНЕ овој чин ќе придонесе кон помирување во Македонија и релаксирање на политичките тензии
