Шестотини и триесет планинари, ја поминаа патеката долга 14 километри со висинска разлика од 1047 метри, и го искачија Титов Врв по повод традиционалното искачување на највисоката точка на Шар Планина на 2747 метри надморска височина.
“ Сите планинари кои се искачија на Титов Врв и безбедно се вратија на Попова Шапка од каде тргнаа утринава. До највисокиот врв на Шар Планина се искачија 630 планинари од 45 планинарски друштва од седум земји. Долж патеката имавме три пунктови, како и пет медицински лица долж патеката кои не регистрираа ниту еден проблем кај планинарите.
Иако имаше снег на три места, истиот не беше проблематичен за движењето на луѓето. Новитет при искачувањето е започнување со работа на апликација за мобилни телефони со која планинарите можеа да вршат препознавање на биолошката разноликост додека пешачат кон Титов Врв. Апликацијата е направена од членови на Истражувачко друштво на биолози-студенти и Македонско еколошко друштво. Со таа апликација можеше да се направи скенирање на некое цвеќе на пример и потоа се добива информација за каков вид на растение станува збор.”
– инфомираше Јован Божиновски, претседателот на планинарскиот клуб „Љуботен” кои се организатори на традиционалното искачување.
