Од 25-ти јуни, до 4-ти јули, триесетина уметници од Шпанија, Србија, Хрватска, Црна Гора и Македонија, ќе ги создаваат своите уметнички дела во 5 работилници и колонии, кои веќе 61 година ги организира Центарот за современа ликовна уметност од Прилеп.
Годинава тоа се сликарската колонија, скулпторскиот симпозиум, студиото за пластика во дрво, како и во атељеата за скулптура во метал и уметничка фотографија.
Горан Ристески, претседател на здружението Центар за современа ликовна уметност изјави :
Досега се изработени околу 200 скулптури, од кои 120 се монументални, парковски формат, кои што се изложени во Прилеп, Битола, Скопје и во други градови. Интересот на уметниците за учество на симпозиумот, како и секогаш низ годините, е голем. Се надевам дека и во иднина ќе продолжиме со нашата општествена одговорност и ќе ја приближиме уметноста до сите граѓани. Во овие 10 дена околу 30 уметници ќе творат во сите работилници кои ги опфаќа Центарот.
Градоначалникот на општина Прилеп додаде:
Општина Прилеп секогаш дава поддршка на уметничките збиднувања. И оваа година издвои финансиска помош во знак на поддршка на Центарот за современа ликовна уметност. Тие и во иднина ќе ги организираат колониите и дружењата со уметниците не само од земјата, туку и од странство. Ми претставува чест да бидам во една ваква дружба со нив, бидејќи сите тие создаваат уметнички дела кои се културно наследство за Прилеп, што е значајно за туризмот и уметноста. Затоа уште еднаш сакам да им ја честитам 55 годишнината од постоењето на овој симпозиум.
Скулпторите Татјана Каравелиќ, Марина Стопоња, Милија Стојановиќ и Џузепе Спито, доаѓаат од Србија, Хрватска, Црна Гора и Шпанија се дел од 55.Интернационален скулпторски симпозиум. Тие за прв пат учествуваат на оваа колонија и се воодушевени од начинот на кој се пречекани , а ја истакнаа и љубезноста на граѓаните на Прилеп. Задоволни се од условите за работа, нагласувајчи дека прилепскиот мермер е одличен за работа.
